ABŞ Prezidenti Co Bayden İsrailə səfəri zamanı dürüst bir vasitəçi kimi çıxış etmək və Təl-Əvivə daha çox dəstək göstərmək niyyətində idi.
Axar.az xəbər verir ki, bu barədə “Əl Cəzirə” yazıb.
“Bayden həmçinin israilliləri humanitar təsirləri minimuma endirmək üçün Qəzza zolağındakı əməliyyatlarında ehtiyatlı olmağa çağırıb. Bu, Qəzzadakı Əl-Əhli xəstəxanasına edilən hava hücumundan sonra daha da aktuallaşıb. Bayden indi gözlədiyindən daha qeyri-stabil vəziyyətdədir. Qəzza zolağında genişlənmiş əməliyyatın israillilərə qlobal dəstəyi sarsıda biləcəyi riskinin olduğunu desə, bu, İsraillə danışıqlarda mövqeyini gücləndirə bilər”, - məqalədə qeyd olunub.
Məqalə müəllifinin sözlərinə görə, ərəb liderlərin Baydenlə görüşü ləğv etmələri Ağ Ev üçün biabırçılıq və məğlubiyyət oldu:
“Bayden hesab edir ki, danışıqlar aparıb onları bir araya gətirə bilər. Bu inam indi şübhə altına alınıb. Sonuncu dəfə kim ABŞ prezidenti ilə görüşdən imtina edib? Məhz bunu indi iordaniyalılar, misirlilər və fələstinlilər etdi”.
Qeyd edək ki, ötən gün Qəzzada xəstəxanaya endirilən raket zərbəsi nəticəsində yüzlərlə insanın ölümündən sonra Baydenin İordaniyada dörtərəfli görüşü ləğv edilib.
