Hindistan və Pakistanın hərbi rəsmiləri bu gün iki ölkə arasında təxminən son 30 ilin ən ağır döyüşlərindən sonra növbəti addımları müzakirə edəcəkdilər. Bu barədə Hindistan KİV Xarici İşlər Nazirliyinə istinadla məlumat yaymışdı.Təmasların yalnız hərbi səviyyədə olacağı, hələlik diplomatik müzakirələrin planlaşdırılmadığı bildirilib. Lakin “Reuters” agentliyi Hindistan Silahlı Qüvvələrinə istinadla məlumat yayıb ki, Hindistan-Pakistan hərbi rəsmilərinin bu günə nəzərdə tutulmuş danışıqları təxirə salınıb. Hərbi rəsmilərin söhbəti bu gün axşama qədər təxirə salınıb.
Cross Media Təhlil Mərkəzinin analitiki, siyasi şərhçi Mübariz Göyüşlü Sherg.az-a söyləyib ki, iki ölkə arasında yaranmış gərginliyin azaldılması və münaqişənin dinc yolla həlli üçün alternativ yol yalnız diplomatik müzakirələrin aparılması və sülhün əldə olunmasına yönəlmiş ciddi addımların atılmasıdır:
“Bu baxımdan, hərbi toqquşmalar və zorakı yanaşmaların davam etməsi vəziyyəti yalnız daha da gərginləşdirə və regionda sabitliyə təhlükə yarada bilər. Yəni əslində, bu durumdan çıxış üçün başqa real alternativ yoxdur. Hindistan və Pakistan uzunmüddətli perspektivdə bu yeganə çıxış yolunu qəbul edir və müəyyən mənada artıq bir danışıqlar masası arxasına əyləşməyi düşünürlər. Sözsüz ki, bu danışıqlar yalnız formal xarakter daşımamalı, əksinə, əhatəli və məqsədyönlü olmalıdır. Əgər tərəflər səmimi şəkildə prosesə yanaşsalar, bu dialoq əsasında gələcəkdə ciddi və davamlı sülhün təməli qoyula bilər. Bu isə yalnız ilkin razılaşmalarla yekunlaşmamalıdır. Növbəti mərhələdə hər iki dövlət arasında rəsmi sənədin imzalanması və həmin sənəddə əks olunan prinsiplərə ciddi şəkildə əməl olunması mütləqdir. Belə bir sənəd tərəflər üçün həm hüquqi, həm də siyasi baxımdan məsuliyyət daşıyacaq və gələcəkdə qarşıdurmaların təkrarlanmasının qarşısını almağa xidmət edəcəkdir”.
