İsrail Prezidenti İsxak Hersoq İsrail-Almaniya münasibətlərinin 60 illiyi münasibətilə Berlinə səfər edib.
AZƏRTAC xəbər verir ki, Almaniya Prezidentinin iqamətgahında - “Bellevue” sarayında İsrail Prezidentinin rəsmi qarşılanma mərasimi olub.
Dövlət başçılarının birgə mətbuat konfransında Almaniya Prezidenti Frank-Valter Ştaynmayer İsrail ilə Almaniya arasında barışıq və uzlaşmanın daha sabit dövrlər üçün ümidverici olduğunu vurğulayıb: “Bizim tariximiz xüsusilə indiki dövrdə digərlərinə də ümid verməlidir”.
Yaxın Şərqdə gərginliyə də toxunan Almaniya Prezidenti İsrailin terror təhdidi qarşısında özünü müdafiə etməli olduğunu qeyd edərək, Qəzza zolağında humanitar yardımların bərpasının vacibliyini vurğulayıb.
Səfər çərçivəsində hər iki prezident Alman-İsrail gənclik konfransına qatılıblar. İsrail Prezidenti, həmçinin faşist Almaniyası dövründə əsir düşərgələrinə aparılan yəhudilərin xatirəsinə inşa olunan 17-ci Perron abidəsini ziyarət edib.
Mayın 13-də dövlət başçıları birlikdə İsrailə səfər edəcək, diplomatik münasibətlərin qurulmasının 60 illik yubileyi münasibətilə keçiriləcək tədbirlərdə birlikdə iştirak edəcəklər.
Almaniya-İsrail münasibətlərinin tarixində ilk dəfə olaraq prezidentlərin ardıcıl qarşılıqlı səfərinin reallaşdırılması yaxın dostluğun göstəricisi kimi qiymətləndirilir.
İsrail Prezidentinin Almaniyanın Kansleri Fridrix Merts ilə görüşü də nəzərdə tutulub. Baş nazir səfərlə bağlı paylaşımında qeyd edib: “İsrailin mövcudluğu və təhlükəsizliyi bizim dövlət siyasətimizin əsas prinsipidir”.
Xatırladaq ki, İkinci Dünya müharibəsində 6 milyon yəhudinin qətlə yetirildiyi Holokostdan sonra iki ölkə arasında diplomatik münasibətlər 1965-ci il mayın 12-də Baş nazirlər Lüdviq Erhard və Levi Eşkol tərəfindən imzalanan müqavilə ilə qurulub.
