Dünən parlamentdəki “Ermənistan” fraksiyası bu blokun lideri, sabiq prezident Robert Köçəryanın rəhbərliyi ilə toplanıb.
Teleqraf xəbər verir ki, bu barədə “Hraparak” qəzeti məlumat yayıb.
Erməni nəşri yazır ki, bir neçə saat davam edən iclasdan sonra mətbuata heç bir bəyanat verilməyib:
“Fraksiyadan bizə bildirilib ki, bu, sadəcə, adi iclas idi, sədr (Köçəryan) mütəmadi olaraq fraksiya iclaslarında iştirak edir. Toplantıda parlamentin növbəti iclasları öncəsi fraksiyanın strategiyası və fəaliyyəti müzakirə olunub.
Bizə o da deyilib ki, fraksiya daha radikal mövqe tutmaq qərarına gəlib”.
Ətraflı
Söhbət parlamentdə Ermənistan Baş naziri Nikol Paşinyana qarşı impiçment prosesinin başladılmasından gedir.
Blokdan “Hraparak”a bildirilib ki, fraksiya bu barədə mövqeyini daha əvvəl açıq şəkildə bəyan edib:
“Fraksiyanın deputatı Artur Xaçaturyanın sözlərinə görə, əgər təşəbbüskarlar hakim “Vətəndaş Müqaviləsi” Partiyasının 10-15 üzvünün imzasını ala bilsələr və kütləvi etiraz aksiyaları təşkil edə bilsələr, o zaman bu haqda danışmaq olar”.
Nikol Paşinyana qarşı impiçment kampaniyasının təşkilatçıları sabiq səfir Edqar Qazaryan və “Veto” hərəkatının rəhbəri Narek Malyandır.
