Azərbaycan və Küveyt arasında Əməkdaşlıq üçün Birgə Komissiyanın 3-cü iclası keçirilib.
Bu barədə XİN-dən məlumat verilib.
Azərbaycan Respublikası və Küveyt Dövləti arasında ikitərəfli əlaqələrin gücləndirilməsi üzrə qarşılıqlı öhdəliklər çərçivəsində, bir tərəfdən Azərbaycan Respublikasının xarici işlər naziri cənab Ceyhun Bayramov, digər tərəfdən Küveyt Dövlətinin xarici işlər naziri cənab Abdullah Əli Əl-Yəhyanın sədrliyi və hər iki ölkənin nümayəndələrinin iştirakı ilə Küveyt Dövlətində 30 aprel 2025-ci il tarixində Azərbaycan Respublikası və Küveyt Dövləti arasında Əməkdaşlıq üçün Birgə Komissiyanın 3-cü iclası keçirilib.
Azərbaycan Respublikası və Küveyt Dövləti arasında Əməkdaşlıq üçün Birgə Komissiyanın 3-cü iclasının işinin sonunda iclasın təsdiq olunmuş protokolu, ona nəzarət mexanizmləri, onun əlavələri – növbəti iki il üçün müştərək yol xəritəsi imzalanıb. Bu hər iki ölkənin bütün aidiyyəti qurumlarının strateji əməkdaşlıq vasitəsilə müxtəlif sahələrdə fəaliyyətini, eləcə də əməkdaşlıq çərçivəsini, konkret prosedurları və 2025–2027-ci illər üzrə müddəti əhatə edir. Tərəflər, həmçinin kənd təsərrüfatı sahəsində əməkdaşlıq müqaviləsini, idman, mədəniyyət və turizm sahələrinə aid bir neçə fəaliyyət proqramını imzalayıblar.
Yekunda, tərəflər Birgə Komissiyanın 4-cü iclasının 2027-ci ildə Azərbaycan Respublikasının paytaxtı Bakı şəhərində keçirilməsi barədə razılığa gəliblər.
Milli Məclisin deputatı Azər Badamov Sherg.az-a bildirib ki, Azərbaycanla Küveyt arasında diplomatik əlaqələr 1994-cü ildən yaranıb:
"Ölkələrimiz BMT, İslam Əməkdaşlıq Təşkilatı və bir sıra beynəlxalq təşkilatlarda əməkdaşlıq edir. Küveyt həmişə Azərbaycanın mövqeyini dəstəkləyib. Azərbaycan və Küveyt parlamentləri arasında əlaqələr 1997-ci ildən yaranıb. İqtisadi sahədə isə əməkdaşlıqımız o qədər də genişlənməyib. Belə ki, Azərbaycanla Küveyt arasında ticarət dövriyyəsi 1 milyon dollara yaxındır. Azərbaycan-Küveyt arasında keçirilmiş Əməkdaşlıq üçün Birgə Komissiyanın 3-cü iclası ölkələrimiz arası əlaqələrin möhkəmlənməsi baxımından əhəmiyyətli olacaq. İclasda Azərbaycanın Küveyt Dövləti ilə əlaqələrin genişləndirilməsində, habelə ümumi prioritetli nailiyyətlərə çevrilməsində maraqlı olduğu bildirilib. Ölkələrimiz arası istifadə olunmamış iqtisadi potensial böyükdür. Azərbaycan ixrac bazarlarının şaxələndirilməsində maraqlıdır. Bu baxımdan Küveytlə iqtisadi əlaqələrimizin dərinləşməsi qeyri-neft məhsullarımızın Küveyt bazarına çıxarılmasına imkan yardacaq".
