PKK terror təşkilatının tərksilah və özünüləğv qərarı verməsi ilə “Terrorsuz Türkiyə” prosesində ikinci mərhələyə keçilir. Prosesin ən önəmli mərhələsi olan və 3 ay çəkməsi gözlənilən bu dönəmdə silahların təhvil alınması məsələsi həllini tapacaq.
Teleqraf xəbər verir ki, bu barədə Türkiyə KİV məlumat yayıb.
Qeyd edilir ki, iyun ayında Türkiyə, İraq və Suriyada bunun üçün mexanizm formalaşdırılacaq:
“Silahların təhvil alınması üçün Süleymaniyyə və Ərbildə (İraq) iki ayrı komissiya yaradılacaq. Bu komissiyalarda İraq mərkəzi hökuməti, İraq Kürd Muxtariyyəti və Türkiyə Milli Kəşfiyyat Təşkilatı (MİT) birlikdə çalışacaq. Silahsızlaşdırma prosesi MİT tərəfindən 24 saat izləniləcək”.
KİV bildirir ki, terror təşkilatının təxminən 250 nəfərdən ibarət lider heyətinin İraq və Suriyada qalmasına icazə verilməyəcək:
“Təşkilatın liderləri üçüncü ölkələrə gedə biləcəklər, amma bir ölkədə qrup halında qalmaları mümkün olmayacaq. Türkiyə prosesi İraq və Suriya ilə birlikdə həyata keçirəcək”.
PKK terror təşkilatının qurucusu Abdullah Öcalanın da həbsdə qalacağı bildirilir.
