Rusiya Prezidenti Vladimir Putin mənə görə bütün Ukraynanı ələ keçirməyəcək.
Bunu ABŞ Prezidenti Donald Tramp deyib.
“(Putin) Mənə hörmət edir, inanıram ki, mənə görə bütün Ukraynanı ələ keçirməyəcək. Onun qərarı bütün Ukraynanı ələ keçirmək idi”, - Amerika lideri bildirib.
Tramp həmçinin Putinin Ukrayna şəhərlərinə raket atdığını görəndə sevinmədiyini iddia edib.
Politoloq Oqtay Qasımov Sherg.az-a söyləyib ki, Donald Trampın müharibə ilə bağlı mövqeyi əslində ona yönəlib ki, Ukraynanın ərazi bütövlüyünün pozulması hesabına olsa da, Rusiyanın bir çox tələblərini yerinə yetirməklə savaş dayandırılsın:
"Bununla da Vaşinqton ABŞ-nin Rusiya ilə bir çox sahələrdə əməkdaşlığına start verilməsində maraqlıdır. Məhz Tramp Putinin ona görə Ukraynanın tamamının ələ keçirilməməyi söyləməklə bu fikri aşılamağa çalışır ki, guya o olmasa, Rusiya bütün Ukraynanı işğal edə bilər. Faktiki olaraq Ağ Evin sahibi Rusiyanın işğalına bəraət qazandırmaqla Ukraynaya təzyiq nümayiş etdirir. Həmçinin bütün bunlar Ukraynanın ərazi güzəştlərinə getməsi üçün bildirilir. Bir müddət öncə Tramp Krımın Rusiyaya verilməsi ilə bağlı fikirlər səsləndirmişdi. Eyni zamanda bu münaqişə ilə bağlı keçmiş ABŞ Prezidentlərini də günahlandırmışdı. Lakin nəzərə almaq lazımdır ki, 2018-ci ildə ABŞ Donald Trampın hakimiyyət dönəmində Krımın işğal və ilhaqına görə Rusiyaya qarşı sanksiyalar tətbiq edib".
Politoloqun sözlərinə görə, ümumiyyətlə ABŞ Prezidentinin fikirləri bütün dünyada özünə bəraət qazandırmaq və Ukraynanı təzyiq altında qoymaqla irəli sürülən şərtləri qəbul etməyə xidmət göstərir.
