Rusiya Prezidenti Vladimir Putin amerikalı həmkarı Donald Trampı məyus etməkdə davam edir. Bunu Rusiya liderinin mayın 15-də İstanbulda mümkün görüşə gəlməməsi sübut edir.
Teleqraf xəbər verir ki, bu barədə “The Wall Street Journal” yazır.
ABŞ prezidenti rusiyalı həmkarının danışıqlarda iştirak etməməsini onunla əsaslandırmağa çalışıb ki, guya o, İstanbula gəlsəydi, Putin də gələcəkdi. Ardınca deyib ki, Putinlə o, görüşməyənə qədər heç nə olmayacaq.
WSJ qeyd edir ki, İstanbulda görüşün təşəbbüskarı Putin olub, Tramp Ukrayna Prezidenti Volodimir Zelenskidən onunla razılaşmağı istəyib.
Amerika nəşrinin fikrincə, Putinin gəlməkdən imtina etməsi onun müharibəni bitirməkdə ciddi olmadığının daha bir sübutudur:
“Rusiya lideri sülhdə maraqlı deyil, çünki Ukraynanın yeni ərazilərini işğal edəcəyinə ümid edir, həm də bilir ki, Ukrayna bir neçə həftəyə ABŞ-dən aldığı sursatları tükəndirəcək”.
Putin hərbi əməliyyatları davam etdirərkən sülhdən nə qədər çox danışırsa, Tramp bir o qədər pis görünür, bu, onu Kremlə yalvaran biri kimi göstərir”.
WSJ yazır ki, sülhə aparan ən yaxşı yol Moskvaya təzyiqin artırılması, o cümlədən ABŞ-nin Rusiya neftini alan ölkələrə qarşı ikinci dərəcəli sanksiyaları ola bilər. ABŞ Maliyyə Nazirliyinin keçmiş baş iqtisadçısı Erik van Nostrand hesab edir ki, Rusiya neftinin dörddə birinin bazardan çıxarılması Kremlin neft gəlirlərini 20 faiz azaldacaq.
Nəşrin yazdığına görə, Putindən məyus olan Tramp Ukraynaya hərbi yardımı dəstəkləyə və artıra bilər.
