ABŞ Prezidenti Donald Tramp Dohada Qətər əmiri Şeyx Təmim bin Həməd Al Tani ilə görüşündə Rusiya-Ukrayna münaqişəsinin sülh yolu ilə həlli yollarını və regional təhlükəsizlik məsələlərini müzakirə edib.
Teleqraf xəbər verir ki, Tramp görüşdən sonra jurnalistlərə açıqlamasında deyib: "Bir neçə saatlıq çox maraqlı söhbət oldu. Biz dünyanı müzakirə etdik. Sizin bir çox cəhətdən, çox kömək etdiyiniz Rusiya və Ukraynanı müzakirə etdik. Maraqlı vəziyyətin yarandığı İranı da müzakirə etdik. Mən hiss edirəm ki, hər şey bu və ya digər şəkildə düzələcək", - deyə Tramp bildirib.
Tramp, həmçinin qeyd edib ki, Qətər ABŞ-ın “Boeing” şirkətindən ümumi dəyəri 200 milyard dollar olan 160-dan çox təyyarə sifariş edib: "Bu, Boeing tarixində təyyarələr üçün ən böyük sifarişdir".
Görüş çərçivəsində tərəflər arasında hərbi sahədə də bir sıra ikitərəfli sazişlər imzalanıb. Bu razılaşmaların regionda təhlükəsizlik əməkdaşlığını daha da dərinləşdirəcəyi bildirilir.
Qətər Ukrayna böhranı başlayandan bəri neytral vasitəçi mövqeyi ilə çıxış edərək, həm Rusiya, həm də Qərb ölkələri ilə dialoqu davam etdirir. Trampın bu görüşdə Qətərin vasitəçilik rolunu önə çəkməsi, münaqişənin diplomatik yolla həllinə ümidin hələ də aktuallığını göstərir.
