Birləşmiş Ərəb Əmirliklərinin "Al-Arabiya" telekanalı ABŞ Prezidenti Donald Trampın Səudiyyə Ərəbistanına səfəri zamanı çəkilmiş görüntülərini süni intellekt vasitəsilə dəyişdirərək, Birləşmiş Ştatlar liderinin guya ənənəvi ərəb qəhvəsini içdiyini nümayiş etdirib.
Oxu.Az xəbər verir ki, bu barədə beynəlxalq KİV məlumat dərc edib.
Belə ki, ötən gün baş tutan səfərin rəsmi hissəsində Donald Tramp ona təqdim edilən ərəb qəhvəsini içməkdən imtina edib. Bu davranış isə ərəb mədəniyyətində qonağın ev sahibinə qarşı hörmətsizliyi kimi qəbul olunur.
Mümkün qalmaqaldan yayınmaq üçün jurnalistlər real kadrlara süni intellekt vasitəsilə düzəliş edərək həmin narahatedici anı videodan çıxarıb və ictimaiyyətə dəyişdirilmiş versiyanı təqdim ediblər. Lakin bəzi kadrlarda fərqlilik dərhal nəzərə çarpıb.
