Türkiyə PKK terror təşkilatının özünü ləğv etməsi qərarı fonunda yayılan Konstitusiya dəyişikliyinə gedilərək, müstəqil və federal idarəetmə sisteminin yaradılacağı iddiasını təkzib edib.
Teleqraf xəbər verir ki, bu barədə Türkiyə Dezinformasiya ilə Mübarizə Mərkəzinin açıqlamasında bildirilib.
Qurum iddianı “dezinformasiya” adlandırıb. Açıqlamada qeyd olunur ki, dövlətin məqsədi “Terrorsuz Türkiyə” strategiyası ilə PKK-nın tərksilah olması və özünü ləğv etməsi prosesini heç bir danışıqlar və sövdələşməyə əsaslanmadan idarə etməkdir. “Hazırda Türkiyədə Konstitusiya dəyişikliyi ilə bağlı hazırlıqlar sivil, demokratik, azad və inklüziv bir konstitusiya yaratmağa yönəlib. Bu dəyişikliklər, xalqın geniş təbəqələrinə xitab edən daha ədalətli və müasir bir hüquqi sistem qurmağı hədəfləyir”, - qurum vurğulayıb.
