ABŞ və Qərbi Avropa sakinləri əmindirlər ki, 5-10 il ərzində nüvə silahının istifadəsi ilə Üçüncü Dünya müharibəsinin başlanması mümkündür.
Teleqraf xəbər verir ki, bunu İkinci Dünya müharibəsində qələbənin 80 illiyi ilə əlaqədar “The Guardian” və “YouGov”un keçirdiyi sosial sorğunun nəticələri göstərir.
ABŞ və Qərbi Avropa sakinləri Üçüncü Dünya müharibəsinin başlamasının ən çox ehtimal olunan səbəbinin Rusiya ilə münasibətlərdəki gərginlik olduğunu düşünürlər. Böyük Britaniya, Fransa, Almaniya, İtaliya və İspaniyada respondentlərin 41-55 faizi yaxın 5-10 il ərzində yeni dünya müharibəsinin mümkünlüyünə inandığını bildirib. Bu fikri amerikalıların 45 faizi bölüşür.
Sorğuda iştirak edənlərin 68-76 faizi nüvə silahının yeni dünya müharibəsində istifadə olunacağına inanır. Respondentlərin 57-73 faizi Üçüncü Dünya müharibəsinin İkinci Dünya müharibəsindən daha çox insan itkisi ilə nəticələnəcəyini iddia edir.
Bundan əlavə, Qərbi Avropa sakinlərinin əksəriyyəti ölkələrinin dünya müharibəsində iştirak edəcəyinə əmindir. İtaliyalıların 66, britaniyalıların 89 faizi buna inanır.
Sorğuda Rusiya yeni dünya müharibəsinin ən çox ehtimal olunan səbəbi hesab olunur. Bu fikri avropalıların 72-82 faizi, amerikalıların 69 faizi ifadə edib.
Həmçinin Qərbi Avropada ABŞ-yə qarşı mümkün hərbi münaqişə də istisna edilmir. İspaniyada respondentlərin 58 faizi ABŞ ilə gərginliyin qitədə sülh üçün əsas təhlükə olduğunu bildirib.
