Gürcüstan parlamentinin sədri Şalva Papuaşvili illik hesabatı təqdim edərkən deyib ki, Mixeil Saakaşvilini inqilab ssenarisi ilə Gürcüstana seçkilərdən iki gün öncə xamalarla dolu konteynerdə gəlməsini Ukrayna Hərbi Kəşfiyyat Xidməti təşkil edib. Spiker söyləyib ki, Saakaşvili Gürcüstana xarici xüsusi xidmətlərin köməyi ilə daxil olmasından iki gün öncə Brüsseldə dəhlizlərdə gəzib və müşavirələr keçirib. Saakaşvili üçün seçkilərin nəticələrinin açıqlanmasından dərhal sonra inqilabi prosesə başlamaq ssenarisini hazırlamışdılar. Bu inqilab cəhdi də baş tutmadı. Gürcüstanın dövlət təhlükəsizliyi orqanları Saakaşvilini seçkilərdən əvvəlki gecə həbs etdilər.
İqtisadi və Sosial İnkişaf Mərkəzinin nümayəndəsi Fuad Kərimli Sherg.az-a bildirib ki, Mixeil Saakaşvili Gürcüstanda prezidentliyi dövründən sonra Ukraynaya köçərək vətəndaşlıq alıb:
“O, eyni zamanda Ukrayna daxili siyasətində siyasətçi kimi rol oynayıb. Hətta uzun müddət Ukraynada işlədikdən sonra Gürcüstanda prezident seçkiləri başlamazdan bir neçə gün öncə ölkəyə qayıdacağını söyləmişdi. Ümumiyyətlə Qərb ölkələrinin Ukraynaya hərbi və kəşfiyyat üzrə dəstəkləri üstünlük təşkil edir. Belə olan halda Ukrayna üzərindən Saakaşviliyə dəstək verilməsi ehtimalı yüksəkdir. Rusiyanın rolu isə daha çox Saakaşvilinin tapılması və qeyri-qanuni şəkildə ölkəyə daxil olmasının üstünün açılmasında Gürcüstanın hakimiyyətinə köməkdən ibarətdir. Çünki Saakaşvili siyasi görüşünə uyğun olaraq Gürcüstanı Avropa yönümlü olmağa aparırdı. Hazırda Gürcüstandakı hakimiyyət regionun reallıqları əsasında qonşu ölkələrlə yaxşı münasibət qurmağa və Qərbin son illər ölkənin daxili siyasətinə qarışma prosesinin qarşısını almağa çalışdığı üçün reform həyata keçirir. Bu isə Saakaşvilinin yenidən ölkəsinə qayıdaraq siyasətdə yer almağa çalışmasında özünü göstərir”.
