İran, İsrailin xarici kəşfiyyat təşkilatı Mossad adına işləmək ittihamı ilə ölüm cəzasına məhkum edilmiş bir şəxsi edam edib.
Sherg.az xəbər verir ki, İran məhkəmə sisteminə bağlı “Mizan” Xəbər Agentliyinin məlumatına görə, “İsrailin İrandakı ən mühüm casuslarından biri” kimi təqdim edilən Behmən Çubiasl adlı şəxsin ölüm hökmü icra olunub.
Edam olunan şəxsin məlumat texnologiyaları üzrə fəaliyyət göstərən bir şirkətdə çalışaraq ölkənin kritik telekommunikasiya layihələrinə çıxış imkanı əldə edən data mütəxəssisi olduğu bildirilib.
Məlumata görə, Çubiaslın ixtisası sayəsində o, şirkətin bütün layihələrində idarəçi kimi iştirak edib və ölkənin həyati data bazalarına geniş çıxış imkanı qazanıb. Onun Mossad agentləri ilə Birləşmiş Ərəb Əmirlikləri, Ermənistan, Hindistan, Tayland, Vyetnam, İrlandiya və Bolqarıstanda üzbəüz görüşlər keçirdiyi müəyyən olunub.
Xəbərdə qeyd olunub ki, “Mossadın təqsirləndirilən şəxslə əməkdaşlıq etməsinin əsas məqsədi dövlət qurumlarının bazasını ələ keçirmək və İranın məlumat mərkəzlərində pozuntu yaratmaq idi. Bununla yanaşı, elektron cihazların idxal marşrutunu araşdırmaq kimi digər ikinci dərəcəli məqsədlər də güdülürdü”.
