Bakıda keçirilən Çempionlar Liqasının qrup mərhələsinin 2-ci tur oyununda Azərbaycanın “Qarabağ” klubu Danimarkanın “Kopenhagen”ini 2:0 hesabı ilə məğlub edərək klub kassasına növbəti bonusları gətirib.
Sherg.az-ın Azerisport.com-a istinadən məlumatına görə, bu qələbə ağdamlılara əlavə 2 100 000 avro (təxminən 4,2 milyon manat) qazandırıb. Bu, “atlıların” “Benfika” ilə oyunda (3:2) əldə etdiyi məbləğlə eyni rəqəmdir. Beləliklə, iki turdan sonra “atlılar” ümumilikdə 4 200 000 avro (təxminən 8,4 milyon manat) qazanıblar.
Uğurlu çıxışın davamı daha çox bonus vəsaiti gətirəcək. Bundan əlavə, UEFA klubun ümumi turnir cədvəlindəki son mövqeyinə görə və turnirin marketinq komponenti üzrə də ödənişlər edəcək.
Xatırladaq ki, “Qarabağ” Çempionlar Liqasının qrup mərhələsinə vəsiqə qazanmaqla artıq 18 620 000 avro (təxminən 37 milyon manat) təmin edib.
