Ekspertlər hesab edir ki, gedişhaqqının artması müvəqqəti xarakter daşıyır
Bakıda fəaliyyət göstərən taksi xidmətlərində gedişhaqqı artıb. Qiymətin bahalaşmasını taksi sürücüləri və sərnişinlər də "Trend"ə təsdiqləyib. Onların sözlərinə görə, gedişhaqqı 30 faizə qədər bahalaşıb. "Sürücülər bildiriblər ki, hazırkı bahalaşma "Formula-1" ilə bağlıdır. Belə ki, yarışla əlaqədar Bakıya çoxlu sayda turist gəlib.
Bu səbəbdən də taksi xidmətlərindən istifadə artıb. İkinci səbəb kimi isə yarışların keçirildiyi mərkəzi yolların bağlı olması və benzin sərfiyyatının artmasdır. Bu hal müvəqqətidir. Yarışlar bitdikdən sonra qiymətlər əvvəlki vəziyyətinə qayıdacaq", - deyə qeyd edilib. Rəqəmsal İnkişaf və Rabitə Nazirliyindən isə bildirilib ki, taksi minik avtomobilləri ilə daşımalarda tariflər dövlət tərəfindən tənzimlənmir.
Nəqliyyat məsələləri üzrə ekspert Eldəniz Cəfərov “Şərq”ə açıqlamasında qeyd etdi ki, taksi xidmətində gedişhaqqının artması müvəqqəti xarakter daşıyır:
- Həqiqətən də, hazırda paytaxt yollarında sıxlıq və tıxaclar müşahidə edilir. Buna görə də taksi xidmətində də çətinliklər yaranıb. Ümumiyyətlə, taksi xidməti adətən dəyişən tariflərlə müşayiət olunur. Həftənin günlərindən, günün “pik” saatlarından, hava şəraitindən asılı olaraq qiymətlər dəyişir. Bu, həmişə belə olub. İndi isə əlavə çətinliklər də var. Əsas yollar bağlıdır, sürücülər alternativ yollardan istifadə edir, məsələn, 15-20 dəqiqəyə qət edə biləcəkləri məsafəni, yarım saata, hətta daha uzun müddətə qət edirlər. Əlbəttə, bu həm yanacaq sərfidir, həm də əlavə vaxt itkisi. Ona görə də qiymətlərdə bahalaşma baş verib.
E.Cəfərov taksi sürücülərinin əlavə xərclərini xarici turistlərlə kompensasiya edə bilmələri məsələsinə də toxundu:
- Bəzən belə iradlar səslənir ki, yerli camaatla xarici turistlər xidmət haqqında fərqləndirilməlidir. Məncə, bu, düzgün deyil və istehlakçı hüquqlarının pozulmasıdır. Xarici turist də istehlakçıdır, onları maddi cəhətdən daha təminatlı hesab edib “qiymət oxumaq” yanlışdır. Onların da istehlakçı kimi hüquqları var. Yerli əhaliyə bir, əcnəbiyə başqa tarif tətbiq etmək nə hüquqi baxımdan, nə də etik cəhətdən doğru olmaz.
E.Cəfərov taksi xidmətindən istifadə edənlərə bir neçə gün gözləməyi tövsiyə etdi:
- Mayın 15-dən sonra taksilərdə qiymətlər stabilləşəcək. Əvvəlki vəziyyət bərpa olunacaq.
Məlahət Rzayeva
