Ermənistan fevralın 1-dən rəsmən Beynəlxalq Cinayət Məhkəməsinin (ICC) üzvü olub. Ermənistanın xarici işlər naziri Ararat Mirzoyan deyib ki, Ermənistan beynəlxalq ədalət sisteminin əhəmiyyətini anlayır: "Bu da soyqırımı kimi ağır cinayətlər törətmiş şəxslərin məsuliyyətə cəlb olunmasını mümkün edir. Ermənistan həmişə beynəlxalq səviyyədə insanlığa qarşı cinayətlərin qarşısının alınması və pislənməsi proseslərinin fəal iştirakçısı və təşəbbüskarı olub". Mirzoyan bildirib ki, Ermənistan məhkəmənin fəal iştirakçısı olacaq və onun işinə mühüm töhfə verəcək. Qeyd edək ki, İrəvanın Roma Əsasnaməsini ratifikasiya etməsi Rusiya ilə münasibətlərdə də müəyyən soyuqluq yaradıb. Çünki indiki halda Ukrayna ilə müharibədən dolayı barəsində qərar olan Prezident V.Putin Ermənistana səfər edərsə, dərhal həbs olunmalıdır. Təəccüb doğuran məqamlardan biri də odur ki, tarix boyu soyqırımlar törədən, qətliamlar həyata keçirən, əsirlərə dəhşətli işgəncələr verən, torpaqlarımızı 30 ilə yaxın müddətdə işğalda saxlayan ermənilər bu gün həyasızcasına "bəşəri cinayətlərə qarşı çıxdıqlarını" iddia edirlər. Utanmadan bu istiqamətdə "mübarizə apardıqlarını", prosesə töhfə verməyə hazır olduqlarını deyirlər..
Demokratiya və İnsan Hüquqları İnstitutunun rəhbəri, hüquq müdafiəçisi Əhməd Şahidov "Sherg.az"a deyib ki, Ermənistanın Beynəlxalq Cinayətlər Məhkəməsinə üzv olması bu ölkənin siyasi və hüquqi həyatında bir sıra yeniliklərə səbəb olacaq. Ekspertin sözlərinə görə, ən azından beynəlxalq axtarışda olan şəxslər Ermənistana səfər edərkən həbs olunacaqlar:
"Amma burada başqa məqamlar, Qərbin ikili standartları da rol oynayır. Ermənistan Beynəlxalq Cinayətlər Məhkəməsinin üzvü olsa da, ən yaxın keçmişdə Azərbaycan əleyhinə müharibə cinayətləri törətmiş bir dövlətdir. Təəssüflər olsun ki, beynəlxalq məhkəmələrdəki ikili standartlar səbəbindən həmin terrorçuları, cinayətkarları məhkəmə qarşısına çıxarmaq mümkün olmayıb. Bundan sonra da Ermənistanın Xocalıda, Qarabağın bir çox bölgəsində soyqırımlar, dəhşətli qətliamlar törətmiş əliqanlı vətəndaşlarını həbs edəcəyi, yaxud mühakimə olunmaları üçün Bakıya təhvil verəcəyi inandırıcı deyil. Buna ümid etmək sadəlövhlük olar. Azərbaycanla bağlı beynəlxalq ədalətin pozulması, hüququn tələblərinin görməzdən gəlinməsi ilk dəfə qarşılaşdığımız hal deyil. Ötən illər ərzində Azərbaycan dəfələrlə erməni terrorçuların kimliyini müəyyənləşdirərək onları "interpol"a versə də, həmin şəxslərin yeri məlum olduğu halda tutulub Azərbaycana verilməyiblər. O səbəbdən beynəlxalq hüququn tələblərini öz gücümüzə tətbiq etmişik. İkinci Qarabağ müharibəsində və antiterror əməliyyatları zamanı erməni terrorçularını saxlayaraq Bakıya gətirərək mühakimə etmişik. Digər terrorçularla, cinayətkarlarla bağlı da eyni addımlar atılmalıdır. Beynəlxalq məhkəmələrin ədalətinə, obyektivliyinə etimadımız yoxdur".
