Sinif otağını soyuq səngərə dəyişən müəllimlərimiz olub
Qoşqar Ömərov onu tanıyanlar, dərs dediyi şagirdlər, gələcək nəsillər üçün örnək olacaq həyat nümunəsi qoyub getdi
44 günlük Vətən müharibəsində dastan yazanların hər biri igidlik zirvəsini fəth edənlərdir. Qəhrəman oğullarımızın şücayəti vəsv edildikcə, şəhidlərimizin, Vətən qazilərimizin qəhrəmanlıq dastanları, həyat hekayələri bitmir. Onlardan biri də Füzuli, Şuşa, Xocavənd uğrunda döyüşlərdə igidlik göstərərək Vətən torpağına qovuşmuş Qoşqar Ömərovdur. Bu gün vüqarlı Qoşqarın həyat yoluna nəzər salacağıq.
Qoşqar Ömərov 9 fevral 1994-cü ildə Kürdəmir rayonunun Şilyan (Qarasu) kəndində müəllim ailəsində dünyaya gəlib. 2011-ci ildə Qarasu kənd orta məktəbini yüksək qiymətlərlə bitirərək 466 balla Azərbaycan Dövlət Pedaqoji Universitetinin riyaziyyat-informatika fakültəsinə daxil olub. 2015-ci ildə Azərbaycan Memarlıq və İnşaat Universitetinin İnformasiya texnologiyaları ixtisası üzrə magistraturaya daxil olub, lakin qısa müddətdən sonra hərbi xidmətə yola düşüb. Hərbi xidmətdən tərxis olduqdan sonra 2016-2018-ci illərdə magistr təhsilini davam etdirib. 2018-ci ildə MİQ imtahanında 57 bal toplayaraq Masazır kənd 5 nömrəli tam orta məktəbdə riyaziyyat müəllimi kimi pedaqoji fəaliyyətə başlayıb.
21 sentyabr 2020-ci ildə Vətənin çağırışına qoşularaq ordu sıralarına daxil olub. 27 sentyabrda Füzuli cəbhəsindən müharibəyə qatılıb, döyüşlərdə xüsusi fəallığı və igidliyi ilə seçildiyinə görə kəşfiyyat bölüyünə daxil edilib. Bir sıra yüksəkliklər uğrunda döyüşlərdə iştirak edib. Noyabrın 4-də Şuşanın Daşaltı kəndinin ətrafında gedən döyüşlərdə şəhidlik zirvəsinə yüksəlib.
Qoşqar Ömərov onu tanıyanlar, dərs dediyi şagirdlər, gələcək nəsillər üçün örnək olacaq həyat nümunəsi qoyub getdi. Qoşqar heç nədən qorxmayan, çəkinməyən, həyatın hər bir çətinliyinə sinə gərən, sağlam həyat, fiziki güc, intellektual cəhətdən çox əhatəli savada malik, bütün imtahanlardan yüksək nəticə qazanan, bütün yenilikləri daha tez qavrayan və tətbiq edən, öz işinə vicdanla yanaşan, Vətənini sevən, ailəyə bağlı, yüksək əxlaqlı bir gənc idi. Şəhidlik zirvəsini fəth etməsi isə onu xalqın gözündə daha böyük yüksəklərə qaldırdı. Vətən müharibəsi günlərində sinif otağını soyuq səngərə dəyişən müəllimlərimiz çox oldu. Lövhə qarşısında elm bələdçisiykən, bir an belə tərəddüd etmədən düşmən qarşısında topdağıtmaz istehkamı əvəz elədilər. Hər biri son dərsinə girdi. Düşmənə elə bir dərs keçdilər ki, dünyanı heyrətə gətirdilər. Həmin qəhrəman müəllimlərdən biri də Qoşqar Ömərov oldu. Qoşqar müəllim düşmən üçün keçilməz dağ, şagirdləri və xalq üçün qürur yeri oldu. Vətən müharibəsindən əvvəl valideynləri, ailəsi, onu tanıyanlar üçün ləyaqətli insan, ən əsası da şagirdləri üçün vicdanlı müəllim olan Qoşqar Ömərov Şuşanın Daşaltı kəndi uğrunda gedən döyüşlərdə şəhidlik zirvəsinə ucalıb milli qəhrəman oldu. Qoşqar Ömərov yüksək insani keyfiyyətləri 26 illik qısa ömrünə sığışdıra bildi.
Qoşqarın atası Səxavət müəllim oğlunun elmə, biliyə həvəsli olmasından danışıb:
“Mən öz oğluma V-XI siniflərdə riyaziyyatdan dərs demişəm. Qoşqar sinfin lideri idi. Uşaqlığından mərd, sözünün üstündə duran, haqsızın yanında dayanan, sözünü deməyi bacaran idi. Öz üzərində işləyirdi. Fiziki cəhətdən özünü ev şəraitində yaratdığı alətlərlə inkişaf etdirmişdi. Təlimlərdən sonra deyirdi ki, 3 adam mənimlə bacarmır. Buna baxmayaraq, döyüşkən, dalaşqan deyildi. Problemləri ağılla həll edirdi. Psixoloji cəhətdən də möhkəm idi”.
Bütün bu yüksək məziyyətləri sayəsində Qoşqar düşmənlə döyüşdə qalib əsgər oldu, Vətənin qəhrəman müdafiəçisi kimi şəhidlik zirvəsinə ucaldı. Qoşqar Ömərovun təhsildə, elmdə yolunu onun şagirdləri davam etdirməyə söz veriblər. Lazım gələrsə, müəllimləri kimi onlar da Vətənin keşiyində düşmənlə üz-üzə dayanmağa hazırdırlar. Qeyd edək ki, Qoşqar Ömərov Azərbaycan Respublikasının Prezidenti cənab İlham Əliyevin sərəncamı ilə "Vətən uğrunda" medalı (ölümündən sonra), "Füzulinin azad olunmasına görə" medalı (ölümündən sonra) və “Xocavəndin azad olunmasına görə" medalı (ölümündən sonra) ilə təltif edilib.
Şəhidlərimizin ruhu şad olsun!
