Vladimir Putin və Donald Tramp Kreml rəhbərinin Ukrayna lideri Volodimir Zelenski ilə birbaşa təması məsələsini müzakirə ediblər.
Bu barədə jurnalistlərə Rusiya prezidentinin mətbuat katibi Dmitri Peskov məlumat verib.
“Şübhəsiz ki, Rusiya və Ukrayna arasında birbaşa təmaslar və bu təmasların davam etdirilməsi mövzusu müzakirə olunub,” – deyə Dmitri Peskov qeyd edib.
Politoloq Zeynal Əmrəliyev Sherg.az-a söyləyib ki, Putin və Zelenski arasında birbaşa təmasların olması üçün bir neçə şərt mövcuddur:
"Bu, ilk baxışdan çətin görünsə də, imkansız deyil. Nəzərə alaq ki, Rusiyada Ukrayna Prezidenti ilə bağlı bir qədər tərəddüdlər var. Həmçinin Zelenskinin hakimiyyətinin legitimliyi barədə tez-tez fikirlər səsləndirilir. Kreml bunun belə əsaslandırır ki, Ukraynada artıq Zelenskinin səlahiyyət müddəti başa çatıb. Odur ki, yeni prezident seçkiləri keçirilməlidir. Digər tərəfdən konstitusiyaya görə, ölkə ərazisində müharibənin getdiyi bir mərhələdə Ukraynada hər hansı seçkinin reallaşması mümkünsüzdür. Rusiya və Ukraynanın nümayəndə heyətlərinin yaxınlaşmasını Moskva nəzərə almalı, o cümlədən bu istiqamətdə addımlar atmalıdır. Danışıqların formatı Rusiyanın maraqlarına uyğun gedərsə, liderlər arasında birbaşa təmas baş tuta bilər".
Politoloq qeyd edib ki, ümumilikdə İstanbul görüşü ilə bağlı mühüm gözləntilər var:
"Türkiyə vasitəçi ölkə kimi bu prosesin uğur qazanması üçün əlindən gələni əsirgəmir. Üstəlik, ABŞ da məsələyə töhfə verməyə çalışır. Bu barədə dəfələrlə Tramp administrasiyasının açıqlamaları olub. Liderlər arasında keçiriləcək görüş müharibənin başa çatdırılması və münasibətlərin normallaşması baxımından mühüm əhəmiyyət kəsb edəcək".
