ABŞ Prezidenti Donald Tramp, 2025–2029-cu illər arasında doğulan hər bir amerikalı körpə üçün dövlət dəstəyi ilə min dollarlıq investisiya hesabı yaradılacağını açıqlayıb.
Sherg.az xəbər verir ki, Tramp bu təşəbbüsü, "Uber", "Goldman Sachs" və "Dell Technologies" kimi nəhəng şirkət rəhbərlərinin də qatıldığı Ağ Evdə keçirilən toplantıda təqdim edib. Plana əsasən, 31 dekabr 2024 – 1 yanvar 2029 tarixləri arasında doğulan hər bir uşaq üçün açılacaq hesaba federal hökumət bir dəfəlik 1.000 dollar yatıracaq.
Hesablar valideynlər tərəfindən idarə olunacaq və illik 5.000 dollara qədər əlavə şəxsi yatırımlarla dəstəklənə biləcək. Tramp bu təşəbbüsü “milyonlarla ailənin iqtisadi artımdan faydalanaraq uşaqları üçün daha yaxşı gələcək qurmasına kömək edəcək, ailə dostu bir layihə” kimi təqdim edib.
Özəl sektordan güclü dəstək
Toplantıda "Goldman Sachs", "Uber", "Dell" və "Robinhood"un CEO-ları, işçilərinin övladları üçün milyardlarla dollarlıq ianə vədi verib. Tramp bu liderləri “ölkənin ən böyük biznes zəkaları” adlandırıb.
Nümayəndələr Palatasının sədri Mayk Conson da təşəbbüsə dəstək verərək, bu siyasətin uşaqlara doğulduqları andan maddi üstünlük qazandıracağını deyib.
Bu investisiya hesabları, Trampın “böyük gözəl qanun” adlandırdığı islahat paketinin bir hissəsidir. Lakin bu qanun yalnız Senatda qəbul edildiyi təqdirdə qüvvəyə minəcək. Respublikacıların daha ehtiyatlı mövqeyi isə təsdiq prosesini çətinləşdirə bilər.
