Son günlər Ermənistan Silahlı Qüvvələrinin sərhəd ərazilərində fəallaşması diqqət çəkir. Bu barədə məlumatı hərbi-siyasi analizlər təqdim edən “44th Ranger Regiment” adlı Telegram kanalı yayıb. Kanalın paylaşdığı vizual görüntülərdə Ermənistan ordusuna məxsus 3 ədəd hərbi yük maşını və 5 ədəd artilleriya qurğusunun hərbi hissələrdən kənar, açıq ərazidə yerləşdirildiyi müşahidə olunur. Məlumatda bildirilir ki, bu texnikaların cəmləşdiyi mövqelər döyüş hazırlığı məqsədilə seçilmiş ola bilər. Belə ki, Ermənistan ordusu uzun illərdir müxtəlif bölgələrdə “lokal eskalasiya” strategiyası ilə öz hərbi varlığını nümayiş etdirməyə çalışır. Son müşahidələr də bu təcrübənin davam etdiyini göstərir.
Hərbi ekspert Ədalət Verdiyev Sherg.az-a bildirib ki, tez-tez Azərbaycan ilə Ermənistan arasında müharibənin baş verməyəcəyinə dair bəyanatlar verən Ermənistanın baş naziri Nikol Paşinyan əslində regionda sülhün bərqərar olması üçün deyil, münaqişənin davam etməsi üçün müxtəlif addımlar atmaqda davam edir:
“Son aylar ərzində Ermənistan ordusu xarici ölkələrin dəstəyi ilə əldə etdiyi silah və hərbi texnikanı müxtəlif təlimlərdə sınaqdan keçirib. Eyni zamanda, Azərbaycanla sərhəd ərazilərə əlavə artilleriya qurğuları yerləşdirilib, qoşun hissələrinin yerdəyişməsi həyata keçirilib. Bu isə Ermənistan rəhbərliyinin verdiyi sülh bəyanatlarının real vəziyyətlə ziddiyyət təşkil etdiyini açıq şəkildə nümayiş etdirir. Ermənistan tərəfi görünür ki, zaman qazanaraq yeni hərbi eskalasiyalara hazırlaşır və mümkün silahlı qarşıdurmalar üçün öz ordusunun döyüş qabiliyyətini bərpa etməyə çalışır. Hazırda Ermənistanın genişmiqyaslı müharibə aparmaq gücü və resursu məhduddur. Lakin bu məhdudiyyətlər onun lokal toqquşmalar və təxribat xarakterli hərəkətlərlə bölgədə gərginliyi artırmaq siyasətindən çəkindirmir. Belə davranışlar sülh prosesinə zərbə vurmaqla yanaşı, regionda təhlükəsizlik balansını da pozur. Bütün bunlara baxmayaraq, Azərbaycan Silahlı Qüvvələri hər cür təxribata layiqli cavab verməyə qadirdir və ölkənin suverenliyini, ərazi bütövlüyünü qorumağa tam hazırdır. Ermənistan rəhbərliyi anlamalıdır ki, bu cür təxribatlar nəticə etibarilə onların özləri üçün daha ağır fəsadlara səbəb ola bilər. Regionda sülh və sabitlik yalnız qarşılıqlı inam, real addımlar və beynəlxalq hüququn prinsiplərinə əsaslanan münasibətlər fonunda mümkündür”.
