30 günlük atəşkəs Rusiyanın zəif nöqtəsidir, Putin uzun fasilədən sonra geri dönə bilməz
İstanbulda əldə edilmiş Rusiya-Ukrayna razılaşmalarına uyğun olaraq, Moskva bir qrup rus hərbçisini geri qaytarıb. Rusiya Müdafiə Nazirliyinin məlumatında bildirilib ki, bunun müqabilində Ukrayna qüvvələrindən eyni sayda hərbi əsir qarşı tərəfə verilib. Dəyişdirilən əsirlərin sayı barədə məlumat verilməyib. İstanbulda əldə edilmiş razılaşmalara əsasən, hərbi əsirlərin qarşılıqlı şəkildə dəyişdirilməsi, hər iki tərəfin müəyyən mövzular üzrə hələ də dialoq kanallarını açıq saxladığını göstərir. Mübadilənin İstanbulda əldə olunan razılaşmalar çərçivəsində baş verməsi, Türkiyənin vasitəçi rolunu yenidən ön plana çıxarır. Türkiyə əvvəllər də bu cür mübadilələrin təşkilində aktiv rol oynayıb. Hərbi əməliyyatların davam etdiyi bir şəraitdə belə mübadilələr praktik baxımdan əhəmiyyət daşıyır. Bu, tərəflərin ən azı müəyyən texniki məsələlər üzrə əlaqə saxladığını göstərir və gələcəkdə daha genişmiqyaslı humanitar və ya siyasi razılaşmalar üçün zəmin yaradır.
Politoloq Elxan Şahinoğlu Sherg.az-a açıqlamasında deyib ki, Rusiya və Ukrayna nümayəndələri arasında iki İstanbul görüşü hələ ki, əsirlərin dəyişdirilməsi ilə yadda qalıb. Ekspert bildirib ki, böyük ehtimalla iyun ayının sonunda keçirilməsi planlaşdırılan növbəti görüş də İstanbulda keçiriləcək:
"Bunun özü Türkiyənin bölgədə və dünyada artan rolundan xəbər verir. Ankaranın müharibə aparan Moskva və Kiyevlə dialoq imkanları mövcuddur. Bu da Türkiyənin vasitəçi rolunu artırıb. Bəs Kreml 30 günlük atəşkəsə niyə razılaşmır? Bunun bir neçə səbəbi var. Birincisi, 30 günlük atəşkəsdən sonra yenidən müharibəyə başlamaq Rusiya üçün çətin olacaq. Digərləri kimi Rusiya cəmiyyəti də dördüncü ilinə keçən müharibədən yorulub, ancaq buna açıq etiraz edə bilmir. Ancaq əgər 30 günlük atəşkəsdən sonra Kreml yenidən müharibəyə başlayarsa, bu, Rusiya cəmiyyətində narazılığı açıq müstəviyə keçirəb bilər. Kreml sahibi bu baş verməsin deyə, müharibədə fasilə vermək istəmir. İkincisi, 30 günlük atəşkəs təklifi qəbul olunarsa, bu müddətin daha da uzanması ehtimalı yaranacaq. Kreml isə saxta referendumla Ukraynanın 4 bölgəsini Rusiyaya birləşdirib, ancaq işğalçı ordu hələ həmin bölgələrin administrativ sərhədlərinə çıxa bilməyib".
Analitik qeyd edib ki, atəşkəs olarsa, Rusiyanın həmin bölgələrin tamamını işğal etməsi mümkün olmayacaq:
"Rusiya Prezidenti Vladimir Putin düşünür ki, nə qədər ki, müharibədə fasilə verməyib, döyüşlər vasitəsilə bölgənin sərhədlərinə çıxmaq lazımdır. Halbuki, Kreml sahibini ətrafının yarıtmaz fəaliyyəti daha çox düşündürməlidir. Ukrayna kəşfiyyatının müharibədən uzaq ərazidə bormbardmançı təyyarələri məhv etməsi Rusiyada idarəetmə sisteminin səhlənkarlığından xəbər verir. Putin Ukraynanın yarısını işğal etməyi düşünərkən, müharibə onun evinin içərisinə qədər alovlanıb. Kreml sahibini bu daha çox düşündürməlidir. Müharibə davam etdikcə, Ukrayna kəşfiyyatı Rusiya ərazisində başqa əməliyyatlar da həyata keçirəcək".
