İngiltərə mətbuatı, yüzlərlə kubalının Rusiyada yüksək maaşlı inşaat işi vədi ilə ölkəyə gətirildiyini, lakin gəldikdən dərhal sonra Ukrayna ilə müharibəyə cəbhəyə göndərildiklərini iddia edib.
Sherg.az xəbər verir ki, "Daily Mail" qəzetinə danışan 37 yaşlı Francisco Qarcia, Moskvaya inşaat işi üçün getdiyini, lakin dərhal hərbi formada kubalılar tərəfindən qarşılanaraq, zorla cəbhəyə aparıldığını bildirib. O, əvvəlcə özünə 1.900 funt maaş, Rusiya pasportu və iş icazəsi vəd edildiyini deyib.
“Əmrə tabe olmalı idik, nə su verdilər, nə də yemək”
Qarcia və digərləri hərbi maşınlara mindirilib, uzun bir yolçuluqdan sonra silahlı polislərlə qorunan tərk edilmiş bir idman məktəbinə aparılıblar. 10 gün ərzində bağırış və təhdid altında hərbi müqavilələrə imza atmağa məcbur edildiklərini deyir.
30 günlük hərbi təlim və xəbərdarlıq olmadan cəbhəyə göndəriş
O, Kubadan, Asiya və Afrika ölkələrindən olan yüzlərlə şəxslə birgə 30 günlük hərbi təlim keçdiklərini və ardınca xəbərdarlıq edilmədən cəbhəyə göndərildiklərini bildirir. Səbəb isə Rusiyanın hər gün çox sayda əsgər itirməsi kimi göstərilir.
Yüzlərlə kubalı ölüb
Qarcia, ilk dəfə cəbhəyə göndəriləndə 90 kubalı ilə birlikdə olduğunu, onların yarıdan çoxunun həlak olduğunu bildirib. Onlara nə qorxu göstərməyə, nə də şikayət etməyə icazə verildiyini, rus komandirlərin qorxu göstərənləri döydüyünü deyir.
İki dəfə yaralanıb, tərk edilib və qaçıb
İki dəfə yaralanan Qarcia, rus əsgərlərin onu tərk etdiyini, özü sağ qalmaq üçün mübarizə apardığını qeyd edib. Bir il Donetsk, Soledar və Rostov bölgələrində döyüşdükdən sonra ona bir medal və sertifikat verilib. 2024-cü ilin oktyabrında iki aylıq icazə alıb və bu müddətdə qaçış planı hazırlayıb.
Yunanıstana qədər uzanan qaçış
Belarus, Azərbaycan, BƏƏ və Misir üzərindən Yunanıstana qaçan Qarcia, Afinada iki ay saxlanıldıqdan sonra sərbəst buraxılıb. Hazırda Atinada bir çadırda yaşadığı bildirilir.
İddialara görə, 20 mindən çox kubalı Rus ordusuna cəlb olunub, Ukrayna kəşfiyyatı isə hazırda 7 minə yaxın kubalının müharibədə olduğunu bildirir.
