Ceyhun Bayramov ölkəmizdə səfərdə olan Estoniya Respublikasının xarici işlər naziri Marqus Tsahkna ilə görüşüb.
Bu barədə Sherg.az-a XİN-dən məlumat verilib.
Nazir Ceyhun Bayramov və nazir Marqus Tsahkna arasında baş tutan təkbətək görüş, daha sonra hər iki tərəfin nümayəndə heyətlərinin iştirakı ilə geniş tərkibdə davam edib.
Görüşlərdə Azərbaycan-Estoniya ikitərəfli və çoxtərəfli əməkdaşlıq gündəliyində yer alan aktual məsələlər, habelə regional və qlobal məsələlər müzakirə edilib.
Ölkələrimiz arasında siyasi dialoqun və qarşılıqlı səfərlərin davam etdirilməsi, hüquq-müqavilə bazasının gücləndirilməsi və eləcə də parlamentlərarası təmasların intensivləşdirilməsi imkanları xüsusunda fikir mübadiləsi aparılıb.
BMT, ATƏT və Avropa İttifaqı təsisatları çərçivəsində ölkələrimizin legitim maraqlarına hörmət və qarşılıqlı dəstəyin əhəmiyyəti vurğulanıb. Bu çərçivədə, əməkdaşlıq əlaqələri nəzərdən keçirilib.
Azərbaycan və Estoniya arasında iqtisadi əməkdaşlığın inkişaf perspektivlərinə toxunulub, qarşılıqlı ticarət və investisiyaların artırılması üçün böyük potensialın mövcud olduğu bildirilib. Ölkələrimiz arasında təhsil sahəsində əməkdaşlıq əlaqələrinin vacibliyi vurğulanıb.
Rəqəmsal iqtisadiyyat, bərpa olunan enerji və bağlantılar sahələrində əməkdaşlığın tam potensialından faydalanmaq üçün ticarət-iqtisadi əməkdaşlıq üzrə Azərbaycan-Estoniya Hökumətlərarası Komissiyanın fəaliyyətinin aktivləşdirilməsinin əhəmiyyəti qeyd olunub.
Azərbaycanın işğaldan azad edilmiş ərazilərində həyata keçirilən genişmiqyaslı bərpa və yenidənqurma işləri barədə danışılıb.
Görüş zamanı nazir Ceyhun Bayramov həmkarına Azərbaycan-Ermənistan normallaşma prosesi barədə son inkişaflar barədə məlumat verib, bu çərçivədə, Vaşinqton Zirvəsinin nəticələri və sülh müqaviləsinin paraflanmasının tarixi əhəmiyyəti qeyd edilib.
Regionda daimi sülhün bərqərar edilməsi və sülh müqaviləsinin imzalanması üçün Ermənistan konstitusiyasından ölkəmizə qarşı ərazi iddialarının çıxarılmasının zəruriliyi vurğulanıb.
Görüşlərdən sonra birgə mətbuat konfransı təşkil edilib, nazirlər görüşlərin nəticələrinə dair bəyanatlarla çıxış ediblər.
***
Azərbaycan xarici işlər naziri Ceyhun Bayramov Estoniya xarici işlər naziri Marqus Tsaxnanı qarşılayıb.
Sherg.az xəbər verir ki, bu barədə Azərbaycan Xarici İşlər Nazirliyinin “X” hesabında bildirilib.
Ceyhun Bayramov Marqus Tsaxna görüşüblər.
Görüş zamanı əsas diqqət qarşılıqlı faydalı siyasi dialoqun genişləndirilməsinə və yüksək səviyyəli qarşılıqlı səfərlərin intensivləşdirilməsinə yönəlib.
Nazirlər iqtisadi əməkdaşlığın dərinləşdirilməsi, ticarət və investisiya potensialından tam istifadə edilməsi, həmçinin rəqəmsal iqtisadiyyat, bərpa olunan enerji mənbələri və qoşulma sahələrində tərəfdaşlığın gücləndirilməsi məsələlərini müzakirə ediblər.
Tərəflər, eyni zamanda, avqustda keçirilmiş tarixi Vaşinqton Sammitinin əhəmiyyətini və onun nəticələrini vurğulayaraq Azərbaycan və Ermənistan arasında daha geniş regional vəziyyəti, münaqişədən sonrakı normallaşma və sülh prosesini də diqqət mərkəzində saxlayıblar.
