Rusiyanın İtaliyadakı səfiri Xarici İşlər Nazirliyinə (XİN) çağırılıb.
Teleqraf xəbər verir ki, buna səbəb Rusiya XİN-in sözçüsü Mariya Zaxarovanın “İtaliya Ukraynaya dəstəyini davam etdirsə, dağılacaq” bəyanatı olub.
Zaxarova Roma şəhərindəki Conti qülləsinin uçmasından sonra öz Teleqram kanalında yazıb ki, İtaliya öz vergi ödəyiciləri hesabına Ukraynaya milyardlarla avro xərcləyir:
“İtaliya hökuməti vergi ödəyicilərinin pullarını mənasız yerə sərf etdiyi müddətcə, İtaliya tamamilə çökməklə üzləşəcək - iqtisadiyyatdan tutmuş qüllələrə qədər”.
İtaliyanın xarici işlər naziri Antonio Tacani bu sözləri “kobud və qəbuledilməz” adlandırıb.
“Bir faciə baş verəndə, dağıntılar altında qalan insanlar və zərərçəkən işçilərin hesabına manipulyasiya etmək olmaz. Biz heç vaxt belə etməmişik, hətta Rusiyada faciələr yaşananda da, biz hər zaman həmrəylik nümayiş etdirmişik”.
Qeyd edək ki, Roma şəhərindəki Conti qülləsi noyabrın 3-də günorta saatlarında qismən uçub. Hadisə binada təmir işləri aparılan zaman baş verib və içəridə dörd işçi olub. Onlardan biri dağıntılar altında qalıb və xilasedicilər onu yalnız bir neçə saatdan sonra çıxara biliblər. İşçi daha sonra xəstəxanada vəfat edib.
