“Türk dünyası təkcə müstəqil türk dövlətlərindən ibarət deyil. Onun coğrafi sərhədləri daha genişdir. Hesab edirəm ki, TDT üzvləri olan ölkələrdən kənarda yaşayan soydaşlarımızın hüquqlarının, təhlükəsizliyinin, milli kimliyinin qorunması, onların assimilyasiyaya uğraması kimi məsələləri artıq təşkilat çərçivəsində daim diqqətdə saxlamağın vaxtı gəlib çatıb. Türk dünyasında gənc nəslin yaşadıqları ölkələrdə məktəblərdə öz ana dilində təhsil almaq imkanı olmalıdır”.
Bu sözləri Prezident İlham Əliyev Səmərqənddə keçirilən Türk Dövlətləri Təşkilatının IX Zirvə Görüşündə çıxış edərkən deyib.
Ölkə başçısı qeyd edib:
“Əfsuslar olsun ki, Azərbaycan dövlətinin hüdudlarından kənarda yaşayan 40 milyon azərbaycanlının əksəriyyəti bu imkanlardan məhrumdur. Türk dövlətlərindən kənarda yaşayan soydaşlarımızın öz ana dilində təhsil alması daim təşkilatın gündəliyində olmalıdır. Bu istiqamətdə lazımi addımlar atılmalıdır. Azərbaycan dövləti xarici ölkələrdə yaşayan azərbaycanlıların hüquq və azadlıqlarının, təhlükəsizliyinin təmin edilməsinə xüsusi diqqət verir. Biz acı taleyin hökmü ilə Azərbaycan dövlətindən ayrı düşmüş soydaşlarımızın dilimizi, ənənələrimizi, mədəniyyətimizin qoruyub-saxlanılması, azərbaycançılıq ideyalarına sadiq olmaları, öz tarixi vətənləri ilə əlaqələrinin heç vaxt kəsilməməsi üçün səylərimizi davam etdirəcəyik”.
Məsələni "Sherg.az"a dəyərləndirən sabiq xarici işlər naziri Tofiq Zulfüqarov bildirib ki, bu sözlərin ilk hədəfi İrandır:
"İranın əhalisinin əksəriyyəti türk əsilli azərbaycanlılardır. Ona görə də açıqlamalardakı ən böyük payı cənub qonşumuz üzərinə götürməlidir. Lakin digər ölkələrdə də buna aid problemlər mövcuddur.
Sözügedən məsələnin isə TDT-nin əsas məqsədlərindən biri olduğunu hesab edirəm.
Türk millətinə aid insanların, yaşadığı yerdən asılı olmayaraq hüquqları təmin edilməlidir. Öz dilində təhsil almaq hüququ da bu sırada ən vaciblərdən biridir".
