Avropa Komissiyasının Prezidenti Ursula von der Leyen bu gün Ermənistan Baş naziri Nikol Paşinyanla telefon danışığı aparıb.
APA xəbər verir ki, Aİ lideri Paşinyanla Rusiyanın son dövrdə Ermənistana qarşı tətbiq etdiyi məhdudiyyətləri müzakirə etdiyini bildirib.
“Bu, açıq şəkildə iqtisadi təzyiqdir və qəbuledilməzdir. Avropa Ermənistanın yanında qətiyyətlə dayanır. Biz Aİ-nin dəstək paketini hazırlayırıq. Bu paketə 50 milyon avrodan çox məbləğdə təcili maliyyə yardımı daxildir və əlavə dəstək də olacaq”, - Ursula von der Leyen deyib.
O, həmçinin bəzi Ermənistan məhsulları, xüsusilə kənd təsərrüfatı və ərzaq məhsulları üçün ticarətin asanlaşdırılması üzrə tədbirlərin nəzərdə tutulduğunu bəyan edib: “Bundan əlavə, 10 min gül partiyasının sabah Latviyaya çatdırılması planlaşdırılır. Digər partiyalar da göndəriləcək. Biz həmçinin İrəvanda keçirilən son sammitdə götürülən öhdəliklərin davamı olaraq bizneslərimizi bir-birinə daha da yaxınlaşdıracağıq”.
Aİ lideri qeyd edib ki, Türkiyə ilə ticarət marşrutlarının, o cümlədən Gürcüstan və Türkiyə üzərindən dəmir yolu bağlantısının yenidən açılması çox müsbət addımdır: “Ermənistan Avropa, Cənubi Qafqaz və Mərkəzi Asiyanı birləşdirən strateji mərkəzə çevrilmək potensialına malikdir. Regional əlaqələr bərpa olunduqca biz infrastruktur və sərhəd-keçid məntəqələrinin inkişafına dəstək verməyə hazırıq. Biz bu prioritetləri 23 iyunda keçiriləcək Bağlantılılıq Platformasının nazirlər görüşündə birlikdə irəlilətməyə davam edəcəyik. Bütün bu istiqamətlər üzrə effektiv koordinasiyanı təmin etmək üçün biz birgə Aİ-Ermənistan İşçi Qrupunun yaradılması barədə razılığa gəldik. Bu qurum bütün bu təşəbbüslərin və gələcək addımların icrasına nəzarət edəcək”.
