Avropa İttifaqının missiyasını genişləndirmə təşəbbüsü Rusiya və Türkiyəni bölgədən sıxışdırıb çıxartmaq cəhdidir
Avropa İttifaqının Ermənistan-Azərbaycan sərhədindəki missiyasının genişləndirilməsi müzakirə
olunmaqdadır. Missiyanın rəhbəri Markus Ritter deyib ki, Missiyaya Aİ-yə üzv olan 27 ölkənin
hamısının nümayəndələri daxil ola bilər. Aİ-yə üzv olmayan ölkələrin də Aİ-nin Ermənistandakı
Missiyasına qoşulmasının mümkünlüyünə toxunan Ritter Kanadanın Aİ-nin müşahidə missiyasına
qoşulma qərarını xatırladaraq digər ölkələrdən də analoji marağın olacağı halda bu məsələnin
Brüsseldə müzakirə olunacağını deyib.
Politoloq Tofiq Abbasov vurğulayıb ki, Avropa İttifaqının Ermənistan-Azərbaycan sərhədindəki
missiyasını genişləndirmə təşəbbüsü Rusiya və Türkiyəni bölgədən sıxışdırıb çıxartmaq və rəsmi
Bakıya təzyiq göstərmək cəhdidir. Ekspert bildirib ki, bəzi Qərb ölkələri regionla bağlı öz çirkin
niyyətlərinə nail olmayacaqlar:
"Azərbaycan öz hədəflərinə doğru irəliləyir. Artıq torpaqlarımız işğaldan azad olunub, ərazi bütövlüyümüz və suverenliyimiz bərpa edilib. Bizim üçün hazırda hansısa təhdiddən söhbət gedə bilməz. Fransa çox çalışırdı ki, ABŞ-nin hərbi kontingentini də
müxtəlif adlarla bölgəyə gətirsin. Amma bunun reallaşması qeyri-mümkündür. Bunların hamısı
diplomatik oyunbazlıqdır və birbaşa İrəvan tərəfindən həyata keçirilir".
