Azərbaycan, Türkiyə və Pakistan arasındakı münasibətlər sadəcə dövlətlərimiz tərəfindən imzalanan sənədlərlə deyil, xalqların qəlbində yaşayan duyğularla möhkəmlənib
Müasir geosiyasi reallıqlar fonunda regional əməkdaşlıq və strateji tərəfdaşlıqlar qlobal güc balansının formalaşmasında xüsusi əhəmiyyət kəsb edir. Azərbaycan, Türkiyə və Pakistan kimi ortaq tarixə, mədəniyyətə, dinə və ideoloji dəyərlərə malik olan qardaş dövlətlər bu baxımdan unikaldır. Bu ölkələrin əməkdaşlığı təkcə coğrafi yaxınlıq və diplomatik münasibətlər çərçivəsində deyil, həm də xalqların tarixi bağlılığı və strateji hədəfləri ilə müəyyən olunur. Bu baxımdan 28 May tarixində Laçın şəhərində keçirilən üçtərəfli Zirvə görüşü bu baxımdan mühüm dönüş nöqtəsi oldu.
Milli Məclisin deputatı, Ana Vətən Partiyasının sədr müavini Günay Ağamalı da “Şərq”ə açıqlamasında qeyd edib ki, Azərbaycan, Türkiyə və Pakistan tarixən ortaq dini, mədəni və siyasi dəyərlərə malik qardaş dövlətlər olaraq, bu gün də birgə strateji xətt üzrə uğurla irəliləyirlər. Bu əməkdaşlıq sadəcə diplomatik müstəvidə deyil, eyni zamanda iqtisadi, hərbi və mədəni sahələri də əhatə edir. Laçın şəhərində baş tutan üçtərəfli Zirvə görüşü bu qardaşlığın daha da möhkəmləndirilməsinə və beynəlxalq siyasətdə yeni güc mərkəzi kimi formalaşmasına xidmət edir:
“Azərbaycan, Türkiyə və Pakistan tarixən ortaq dini, mədəni və siyasi dəyərlərə malik olan qardaş dövlətlərdir. Ölkələrimiz arasında mövcud əlverişli siyasi mühit dinamikliyi və interaktivliyi ilə seçilir.
İşğaldan azad olunmuş Laçın şəhərində keçirilən üçtərəfli Zirvə görüşü Bakı, Ankara və İslamabad arasında strateji tərəfdaşlığın daha da möhkəmləndirilməsi və bu əməkdaşlığın beynəlxalq siyasətdə yeni güc mərkəzi kimi formalaşmasına xidmət etdiyini açıq şəkildə nümayiş etdirir.
Zirvə görüşündə müzakirə olunan məsələlər təkcə cari əməkdaşlıq sahələri ilə kifayətlənmədi. Hər üç liderin fikirləri və baxışları olduqca geniş və əhatəli idi. Xüsusilə cənab Prezident İlham Əliyevin səsləndirdiyi fikirlər Azərbaycan, Türkiyə və Pakistan qardaşlığının yalnız diplomatik və iqtisadi əsaslarla deyil, eyni zamanda mədəni və ideoloji müttəfiq olduqlarını təsdiq etdi. Dövlət rəhbərimizin qeyd etdiyi kimi, Azərbaycan ötən müddət ərzində Türkiyə iqtisadiyyatının müxtəlif sahələrinə 20 milyard dollardan çox investisiya yatırıb. Cənab Prezident İlham Əliyevin ideya müəllifliyi əsasında birgə həyata keçirdiyimiz enerji layihələri iki ölkənin iqtisadi tərəqqisinə töhfə verməklə yanaşı, Avropanın enerji təhlükəsizliyində mühüm faktora çevrilib.
Bununla yanaşı, rəsmi Bakı Pakistan iqtisadiyyatına 2 milyard dollar həcmində investisiya yatırmaq niyyətini bəyan edib ki, bu da qardaş ölkənin inkişafına təkan verəcəkdir. Artıq tərəflər arasında konkret investisiya layihələri üzərində işlər gedir. Həmçinin ölkələrimiz arasında hərbi əlaqələr müasir müharibə metodikalarının tələbi çərçivəsində birgə keçirilən hərbi təlimlərlə daha da dərinləşir. Qardaş Türkiyə və Pakistanın müdafiə sənayesinə məxsus qabaqcıl və yüksək texnologiyalı hərbi məhsullar Silahlı Qüvvələrimizin inventarına daxil edilərək, ordu quruculuğu və müdafiə qabiliyyətimizin gücləndirilməsində mühüm rol oynayır. Üç qardaş ölkə yalnız siyasi, iqtisadi və hərbi sahədə deyil, mədəniyyət, elm və təhsil sahələrində də uğurlu tərəfdaşlıq modeli formalaşdırıblar. Universitetlər arasında mübadilə proqramları, mədəni tədbirlər xalqlarımızı bir-birinə daha da yaxınlaşdırır. Nəticə etibarilə, Azərbaycan, Türkiyə və Pakistan arasındakı münasibətlər sadəcə dövlətlərlərimiz tərəfindən imzalanan sənədlərlə deyil, xalqların qəlbində yaşayan duyğularla möhkəmlənib. Çünki bu bağlar qanla, canla, tarixlə və sədaqətlə yazılıb”.
