Kreml, Ukrayna müharibəsi ilə bağlı verdiyi yeni açıqlamada, Rusiyaya qarşı döyüşən xarici qüvvələrə diqqət çəkib.
Sherg.az xəbər verir ki, Kremlin sözçüsü Dmitri Peskov jurnalistlərin Rusiya Xarici Kəşfiyyat Xidmətinin (SVR) Fransa tərəfindən Ukraynaya 2 min hərbçi və zabitdən ibarət hərbi birliyin göndərilməsinə hazırlıq görüldüyü barədə hesabatına dair sualını cavablandırıb.
Rus hərbçilərinin sözlərinə görə, cəbhədə Ukrayna tərəfdən vuruşanlar arasında daim xarici dillərdə danışıldığı müşahidə olunur. Peskov bu xarici döyüşçülərin “məhv ediləcəyini” bildirib.
Çıxılmaz vəziyyətə düşən sülh danışıqlarına da toxunan Peskov deyib ki, Ukraynanın danışıqları dayandırması və Rusiyanın ünvanladığı suallara cavab verməyə meyilli olmaması səbəbindən, Moskva Kiyev ilə sülh prosesini qiymətləndirə bilmir.
Peskov həmçinin Kremlin ABŞ Prezidenti Donald Trampın digər ölkələrə “Rusiya neftinin alınmasını dayandırmaq” çağırışlarını eşitdiyini, lakin Rusiyanın enerji məhsullarını almaq və ya almamaq qərarının tərəfdaş ölkələrin öz seçimindən asılı olacağını vurğulayıb.
Sözçü qeyd edib: “Hər bir ölkə ən yüksək keyfiyyətə və ən rəqabətədavamlı qiymətə malik strateji resursları, xüsusilə də enerji mənbələrini əldə etməkdə maraqlıdır.”
Zelenski üç il daha maliyyə dəstəyi istəyir
Ukrayna Prezidenti Volodimir Zelenski isə bu gün daha əvvəl verdiyi açıqlamada bildirib ki, Ukraynanın Rusiya qüvvələrinə qarşı mübarizəni davam etdirə bilməsi üçün Avropadan iki və ya üç illik maliyyə dəstəyinə ehtiyacı var.
Zelenski deyib:
“Bunu bütün Avropa liderlərinə bir daha xatırlatdım. Onlara dedim ki, biz onilliklərlə davam edəcək bir müharibə aparmaq niyyətində deyilik, lakin müəyyən bir müddət ərzində Ukraynaya sabit maliyyə dəstəyi göstərə biləcəklərini sübut etməlidirlər.”
