“Rəsmi Bakı və ABŞ tərəfindən dəstəklənən ermənilərlə təmasların qurulması üçün bir layihə var”
“Rusiya isə Vardanyanı bölgəyə göndərməklə həmin layihəni əlinə almaq istəyir”
“Yəni Vardanyanı “nümayəndə” kimi Bakının qarşısına çıxarmağa çalışır"
"İddialara görə Vardanyan Araik Artunyanın ardından Rusiyaya gedib"
Bunu "Sherg.az"a açıqlamasında siyasi şərhçi Asif Nərimanlı Vardanyanın yenidən Qarabağa qayıtmasından danışarkən deyib.
O bildirib ki, hər iki səfərin səbəbi Rusiyanın kimi dəstəklədiyini anlamaq üçündür:
"Çünki Vardanyanın qondarma dövlətin “naziri” elan edilməsi Artunyanı narahat edirdi. Bu həmçinin Paşinyanın da mövqeyinə uyğun gəlmirdi. Ümumiyyətlə, Vardanyanın geri qayıtması Rusiyanın ona yeni təlimatlar verərək bölgəyə göndərməsi deməkdir. Yəni Rusiya Vardanyanı Paşinyana qarşı geri qaytarıb. Digər tərəfdən burada Azərbaycan faktoru var. Bilirik ki, Azərbaycan əvvəlcədən Vardanyanı istəmir və ona Moskvanın layihəsi kimi baxır. Rəsmi Bakı və ABŞ tərəfindən dəstəklənən ermənilərlə təməsların qurulması üçün bir layihə var. Bu prosesdə kimin iştirak edəcəyi isə əsas məsələdir. Azərbaycan tərəfi Artunyan və separatçı rejimin rəhbərliyi barəsində cinayət işi açdığı üçün onların nümayəndəliyi mümkün deyil. Rusiya isə Vardanyanı bölgəyə göndərməklə həmin layihəni əlinə almaq istəyir. Yəni Vardanyanı “nümayəndə” kimi Bakının qarşısına çıxarmağa çalışır".
Analitikin sözlərinə görə Vardanyan Xankəndinə qayıtdıqdan sonra separatçı rejimin daxilindəki qarşıdurma daha pik həddə çatacaq:
"Artıq Araik Artunyan "konstitusiya islahatları" adı altında prosesə başlayıb. Buradakı əsas məsələ qondarma rejimin yeni “prezident” seçməsidir. Yəni onlar Rusiyaya görə Vardanyanı prosesdən uzaqlaşdıra bilmirlər. Bu səbəblə də qanuni yola əl atmaq istəyirlər. Həmçinin yeni “prezident”in seçilməsi “hökumət”in buraxılması deməkdir.
Əgər “hökumət” buraxılarsa Vardanyan tutduğu qondarma “nazir” postundan uzaqlaşacaq. Amma Vardanyanın geri qayıtması göstərir ki, Rusiya daxilində onu dəstəkləyən qüvvələr geri addım atmaq istəmir. Bu isə Xankəndidə daha ciddi siyasi qarşıdurma olacağı gözləntisini artırır".
