Bitlisin Tatvan bölgəsində diş ağrısı şikayəti ilə Van Yüzüncü İl Universitetinin Dursun Odabaş Tibb Mərkəzinə müraciət edən gənc xanımın halını görən həkimlər heyrətə gəlib.
“Sherg.az” “Milliyet.com.tr”yə istinadən bildirir ki, Bitlisin Tatvan bölgəsi, Dibəkli kəndində yaşayan 23 yaşlı Qəmzə Kılıçər dəhşətli diş və baş ağrılarına dözməyərək həkimə müraciət edib. Müayinə zamanı onun döş qəfəsində infeksiya əmələ gəldiyi müəyyən edilib. Həkimlər infeksiyanın dişdə əmələ gəlmiş iltihabdan qaynaqlandığını müəyyənləşdiriblər. Qərara alınıb ki, təcili cərrahi müdaxilə edilməlidir. Cərrah, professor Fuat Sayır tərəfindən cərrahi əməliyyat gerçəkləşib. 3 saat davam edən əməliyyat zamanı döş qəfəsində formalaşmış infeksiya aradan qaldırılıb. Əməliyyat haqqında danışan həkim deyib ki, xəstəyə 24-48 saat ərzində təcili cərrahi müdaxilə vacib idi. Əks halda infeksiya bədənə yayılaraq gənc xanımın ölümünə səbəb ola bilərdi: “Əməliyyat zamanı çox diqqətlə döş qəfəsinə müdaxilə etdik, orada formalaşmış infeksiyanı kənarlaşdıra bildik. Bu infeksiyaya səbəb xanımın dişinin uzun müddət ağrıması, diş dibində iltihablaşma yaranması, buna rəğmən dişin müalicə edilməməsi, zamanla iltihabın döş qəfəsinə yayılmasıdır. Xəstənin həyatı təhlükə altında idi. Onu xilas edə bildik”. Professor qeyd edib ki, diş iltihabı – diş apsesi, dişin kökündə əmələ gələn iltihabdır. Bu, çox təhlükəlidir. Bəzən insanlar diş ağrısına adi ağrı kimi yanaşır, evdə müxtəlif vasitələrlə diş ağrısını azaltmağa çalışırlar. Bunlar təhlükəli hallardır. Diş iltihabı ölümlə də nəticələnə bilir: “Kimsə “diş ağrısıdır, keçib gedər”, deyib bunu sadə məsələ hesab etməsin. Diş iltihabı döş qəfəsi boşluqlara yayılaraq çox ciddi, ağır vəziyyət yarada, yüzdə 70 faiz ölümə səbəb ola bilir. İltihabın döş qəfəsi boşluğuna yayılması tibdə “mediastinit” adlanır. Bu halda xəstəyə təcili cərrahi əməliyyat edilməsi vacibdir. Yoxsa xəstə ölə bilər. Qəmzə Kılıçər bir neçə gün diş ağrısı çəkib. Sonra üzü şişib, bundan sonra həkimə müraciət ediblər. Həkimlər bunun diş iltihabı olduğunu və daxili orqanlara yayılma ehtimalının ola biləcəyini bilərək bizim xəstəxanaya göndəriblər. Belə halda xəstə 24-48 saat ərzində əməliyyat olunmalıdır. Şükür ki, xanımın həyatını xilas edə bildik. Hazırda müalicəsi davam edir”.
