"Yayılan videodan görünür ki, İlkin gəzə bilir. Sifətində də heç bir dəyişiklik yoxdur. Amma o, bədənindəki (qolu, ayağı) yaraları məhkəmə zalında hər kəsə göstərib".
Bu fikirləri "Sherg.az"a 10 yaşlı Nərmin Quliyevanı qətlə yetirməkdə təqsirləndirilən İlkin Süleymanovun qardaşı Adil Süleymanov deyib. Onun sözlərinə görə, çəkilən videoda İlkinin ayağı otaqdan çıxarkən qapının kandarına dəyib, sızıldayır, ağrı sifətindən də anlaşılır:
"Hətta qapıdan ikinci dəfə keçərkən ufuldadığı belə hiss olunur. İfadəsinin birində "2 gün əvvəl həyat əlamətlərinin bitdiyini fərq etdim", - deyir. Bu, sadə vətəndaş sözüdür?! Əlbəttə ki, deyil. Sözügedən fikirlər bir daha sübut edir ki, ona ifadə yazdırılıb. Adam deyərdi ki, "nəfəsi kəsildi", "halı yox idi", "ölümcül idi", "ölmüşdü". Videoya nəzər yetirəndə ilk baxışdan görünür ki, İlkin sağa-sola boylanır, qohum-əqrəba axtarır. Özü də məhkəməyə ifadəsində bildirib ki, ətrafa baxıb, qohum-əqrəba axtarırdı. Qardaşıma deyirdilər ki, fikrin burada olsun. İlkinin təzyiq altında olduğu bir daha təsdiqini tapır. Vətəndaşları başa düşürəm. İlkin sevə-sevə bu ifadəni danışıb. Çünki qardaşımı valideynləri, qohumları ilə təhdid ediblər. Ona görə də ifadəni yazıldığı kimi deməli idi. Bu cinayəti işlədiyinə dair hər kəsi inandırmağa çalışırdı. Bunlar hamısı oyundur. Allah böyükdür. Həmd olsun, Allaha. Haqq, ədalət uğrunda mübarizə aparırıq. Bu işdə saxtakarlıq edənləri Allaha həvalə edirik".
Qeyd edək ki, 10 yaşlı Nərmin Quliyevanın ölümündə təqsirli bilinən İlkin Süleymanovun 3 il əvvəlki videosu yayılıb. Video istintaq çəkilişini əks etdirir. İ.Süleymanovun videoda danışdıqları insanlarda qıcıq yaradıb. Bəziləri İlkinin təzyiq altında olmadığını, rahat, sərbəst ifadə verdiyini bildiriblər.
