Qadın din xadimləri sadəcə, xanımlar üçün xidmət göstərə bilərlər
Dini Qurumlarla İş üzrə Dövlət Komitəsinin sədr müavini Gündüz İsmayılov deyib ki, məscid və ziyarətgahlarda din xadimlərinin təyinatı ilə bağlı müsahibələr keçirilir. Onun sözlərinə görə, bu il 44 vakansiya çıxarılıb və onlardan 7-si qadınlar üçündür: “Qadınlar din xadimi deyil. Qadınlar üçün vəzifənin adı dini ayinlərin icraçısıdır. Ümumiyyətlə məscid və ziyarətgahlarda 3 vəzifə müəyyənləşdirilib. Birincisi, imamdır, ikincisi, imam müavini, üçüncüsü, dini ayinlərin icraçısıdır. Bir də qadın dini ayinlərin icraçısı var. Qadınlar məscidlərdə imamların tapşırığına əsasən sırf qadınlara yönəlik fəaliyyətlə məşğul olurlar”. Sədr müavini deyib ki, Bakı, Sumqayıt, Lənkəran, Şəki, Quba, Zaqatala və Gəncədəki məscidlər üçün qadın dini ayinlərin icraçısı vəzifəsi üzrə müsahibələr fevralın 13-dən 15-nə qədər davam edib: "Qadınların müsahibəsində 7 vakansiya üzrə 71 namizəd iştirak edib, onlardan 16-sı müsahibədən uğurla keçib. Qaydalara uyğun olaraq müsahibə bitdikdən sonra 30 iş günü ərzində təyinat alacaqlar".
İlahiyyatçı-alim Hacı Atif İsmayılov "Şərq"ə bildirib ki, islam dinində bəzi hüquqlar əsasında qadınlarla kişilər arasında fərqli hökmlər irəli sürülüb. Ekspertin sözlərinə görə, islam dininə əsasən, qadınlarla kişilərin birgə olması, qarışması bəyənilmir: "Hətta məscidlərdə ibadət üçün toplaşsalar belə, şəriət qanunlarına uyğun olaraq, aralarında pərdə və ya hər hansı maneə olmalıdır. Yaxud qadınların kişilərdən geridə qalması üçün şərait yaradılmalıdır. Qadınlar ancaq qadınlardan ibarət camaata imamlıq edə bilər. Ölkəmizdə də adətən məscidlərin daxilində qadınların ibadət yeri kişilərdən ayrı olur. Bu kimi məsələləri asanlıqla tənzimləmək mümkündür. Lakin əsas məqsəd qadınların dini sahədə maariflənməsidir və bunun üçün mütləq şəkildə qadın din xadimlərinin olması zərurirdir. Qadin din xadiminin olmasının islam dinində heç bir maneəsi yoxdur və onlar sadəcə, xanımlar üçün xidmət göstərə bilərlər. Ancaq yenə deyirəm, qadının ümumilikdə hansısa məsciddə kişilərə imamlıq etməsi dini baxımdan düzgün sayılmır. Hətta qadının öz evində qıldığı namazın savabının məsciddə qılınan namazın savabından daha üstün olduğu islami mətnlərdə qeyd edilir. Bu da qadınların daha qiymətli cövhər olması ilə əlaqələndirilir".
