Birləşmiş Millətlər Təşkilatının Uşaq Fondu (UNICEF) zəlzələlərin Türkiyə və Suriyada 5 milyon uşağa təsir etdiyini açıqlayıb.
Bakupost.az xəbər verir ki, bu uşaqların 2,5 milyonunun humanitar yardıma ehtiyacı olduğu bildirilir. Səlahiyyətlilərə görə, uşaqlar psixoloji və sosial dəstəyə ehtiyac duyurlar. Uşaqların psixoloji cəhətdən zədələnmiş “sabitlik”, “inam” və “maraq” ehtiyaclarının bərpasına diqqət yetirilir.
Mütəxəssislərin fikrincə, uşaqların öz rejimlərini bərpa etməsi, oyun oynaması, əylənməsi, həmyaşıdları və sevdikləri ilə vaxt keçirməsi çox vacibdir. Məhz buna görə də uşaqlara uyğun məkanlar travmanın aradan qaldırılmasında və ya onun təsirlərinin azaldılmasında mühüm rol oynayır. Buna görə də onlar üçün təhlükəsiz məkanlar, sahələr yaradılmalıdır.
Qeyd edək ki, ötən gün UNICEF-in zəlzələ qurbanları üçün topladığı yardımını daşıyan yük təyyarəsi Adanaya çatıb. Yardıma həyat xilasedici ləvazimatlar, çadırlar, yorğanlar, təhsil və psixososial dəstək materialları daxildir.
