"Ermənistanda Qarabağ separatçılarının yenidən fəallaşması özlərinə "prezident" və "parlament sədri" seçməsi birbaşa Moskvanın təlimatı ilə reallaşır".
Bu barədə "Sherg.az"a açıqlamasında politoloq Məhəmməd Əsədullazadə deyib.
Ekspert bildirib ki, prosesləri də idarə edən keçmiş prezident Robert Koçaryandır:
"Sabiq prezident Serj Sarkisyan da Koçaryanın baş nazirliyini dəstəklədiyini vurğulayıb. Yəni, Kremldən Ermənistan müxalifətinə fikir ayrılıqlarına kənara qoyaraq "birləşmək" mesajı verilib. Hər gün müxalifətin əlində olan kütləvi informasiya vasitələrindən Koçaryanın piarı aparılır. Görünür, Moskva Paşinyana alternativ olaraq Koçaryanı seçib. Ermənistanda gələn il keçiriləcək parlament seçkilərinə kimi separatçılar, Kilsə və müxalifətin Koçaryanın ətrafında birləşməsi mümkündür. Baş nazir arxayındır ki, Koçaryan ona qalib gələ bilməz. Amma Koçaryanın toparlanması və ətrafında yeni gücün ortaya çıxması fonunda seçkilərdə Paşinyana qarşı üstünlük əldə edə bilərlər. Ermənistanın ikinci böyük şəhəri olan Gümrüdə Rusiya yönümlü partiya hər seçkilərində qalib gəlir. Ancaq Paşinyan Sarkisyan və Koçaryanı seçkilərə kimi neytrallaşdıra bilər. 2026-ci ilin yayının Ermənistanda "isti" keçəcəyi inidən gözlənilir. Rusiya Ermənistanda yenidən özünə sadiq adamları iqtidara gətirmək üçün birbaşa hərəkətə keçib. Rusiya bununla regiondan Qərbi çıxarmağı və Azərbaycan-Ermənistan arasında sülh müqaviləsini ertələməyi planlaşdırır".
