Hindistanın Mumbai şəhərində ictimai yerlərdə göyərçin yemləmək məhkəmə qərarı ilə qadağan olunub. Qərar bələdiyyə, sağlamlıq mütəxəssisləri və quşsevərlər arasında ciddi mübahisələrə səbəb olub.
Sherg.az xəbər verir ki, on illərlə fəaliyyət göstərən bəzi “kabutarkhana”ların (göyərçin yemləmə yerləri) bağlanmasına qarşı yüzlərlə insan aksiya keçirib, polisə müqavimət göstərib. Bir neçə nəfər saxlanılıb.
Araşdırmalara görə, göyərçin nəcisi nəfəs yolları xəstəliklərinə, göbələk infeksiyalarına və xroniki ağciyər problemlərinə yol açır. 2000-ci ildən bəri ölkədə göyərçinlərin sayı 150%-dən çox artıb, hər quş ildə təxminən 15 kq nəcis ifraz edir.
Göyərçinlər Hindistanın mədəniyyətində və xüsusilə Jain icmasının dini ənənələrində mühüm yer tutur. Buna görə də qadağa dini çevrələrin etirazına səbəb olub.
Məhkəmə xalq sağlamlığını əsas prioritet elan etsə də, alternativ həll yolları üçün ekspert qrupu yaradıb. PETA India isə gündə yalnız müəyyən saatlarda məhdud yemləmə təklif edir.
