Cütlük ilk dəfə 2004-cü ildə ailə qurub, lakin 2017-ci ildə siyasi baxış fərqlərinə görə boşanıb və daha sonra yenidən evlənib
Yaponiyanın ilk qadın Baş naziri seçilən Takaiçi Sanae and içərək vəzifəsinə başladıqdan sonra həyat yoldaşı Yamamoto Taku jurnalistlərə açıqlama verib.
Sherg.az xəbər verir ki, Yamamoto bildirib ki, həyat yoldaşına arxa planda “görünməz ər” kimi dəstək olmağı planlaşdırır:
“Qərbdən fərqli olaraq, burada həyat yoldaşlarının diqqət mərkəzində olmaması daha yaxşıdır.”
O, həmçinin Takaiçinin “hamıdan daha çox işləyən bir insan” olduğunu vurğulayıb.
İki dəfə evləndilər
Cütlük ilk dəfə 2004-cü ildə ailə qurub, lakin 2017-ci ildə siyasi baxış fərqlərinə görə boşanıb və daha sonra yenidən evlənib.
Onların siyasi fikir ayrılığı, Liberal Demokrat Partiyasının (LDP) 2012-ci il sədr seçkilərində Takaiçinin sabiq Baş nazir Abe Şinzonu, Yamamotonun isə sabiq Baş nazir İşiba Şigerunu dəstəkləməsi ilə zirvəyə çatıb.
Ölkənin tarixində ilk qadın Baş naziri
1961-ci ilin martında Yaponiyanın Nara prefekturasının Yamatokoriyama şəhərində doğulan Takaiçi, 1984-cü ildə Kobe Universitetinin Biznes fakültəsini bitirib. 1987-ci ildə ABŞ Konqresinin bir üzvünün ofisində çalışıb.
1989-cu ildə “Matsuşita Hökumət və İdarəetmə İnstitutunu” bitirən Takaiçi, “TV Asahi” və “Fuji TV” kimi kanallarda proqram aparıcısı olub. Tələbəlik illərində “heavy metal” qrupunda nağara çalan Takaiçi, yeni nəsil mediada “açıq sözlülüyü və təsirli nitqi” ilə tanınır.
Panasonic şirkətinin banisi Matsuşita Konosuke ilə görüşmək imkanı qazanan Takaiçi, yapon sənayeçidən aldığı ilhamla siyasətə qədəm qoyub. 1993-cü ildə ilk dəfə müstəqil şəkildə seçkilərə qatılaraq Nümayəndələr Palatasına deputat seçilib və sonradan LDP-yə qoşulub.
30 ildən artıq siyasi karyerası ərzində 10 dəfə parlament üzvü seçilən və müxtəlif nazirliklərdə çalışan Takaiçi, 2012-2020-ci illərdə vəzifədə olmuş “Yaponiyanın ən uzun müddətli Baş naziri” Abe Şinzonun “şagirdi” kimi tanınır.
Hakim Liberal Demokrat Partiyasının (LDP) bu ay keçirilən rəhbərlik seçkilərində qalib gələn 64 yaşlı Takaiçi Sanae, parlamentdə keçirilən səsvermə nəticəsində ölkənin ilk qadın Baş naziri seçilib.
