Ucarda xəstə narkozdan sonra komaya düşüb.
APA xəbər verir ki, hadisə Ucar Rayon Mərkəzi Xəstəxanasında qeydə alınıb.
Səhhətində yaranmış problemlə əlaqədar olaraq xəstəxanaya müraciət edən rayonun Qazyan kənd sakini, 1999-cu il təvəllüdlü Sübhan İlham oğlu Hüseynova bel nahiyəsində olan dermoid kistadan əməliyyat olunması məsləhət görülüb.
Həkimlər tərəfindən xəstəyə verilən narkozdan sonra o, komatoz vəziyyətdə reanimasiya şöbəsinə yerləşdirilib.
Məlumata görə, xəstə hələ komatoz vəziyyətdədir.
Professor Adil Qeybulla “Sherg.az”a açıqlamasında deyib ki, hər bir xəstəyə narkozun verilməsinin riskli məqamları var:
“Dermoid sistlər ambulator şəraitdə həyata keçirilən əməliyyatlar qrupuna aiddir. Bəzi xəstələrin panik vəziyyəti, ağrıdan qorxması narkoz istifadəsinə ehtiyac yaradır. Çox güman ki, burada da bu situasiya yaranıb. Çünki bu əməliyyat həyat üçün təhlükəli deyil. Narkozdan sonrakı ağırlaşmalar çox arzuolunmazdır. Məsələ bundan ibarətdir ki, bunu araşdırmaq lazımdır. Xəstələri bəzən bu cür əməliyyatlara tam müayinə olunmamış götürürlər. Sadə bir əməliyyat olduğuna görə ürək damar sistemində və digər vacib orqanlarda dəyişikliklər öyrənilmədən belə fatal nəticələrə gətirib çıxarır. Burada narkozun gedişi boyu zamanı yol verilən müəyyən nöqsanlar da ola bilər. Bu əməliyyatdan sonra xəstə narkozdan sonra üzü aşağı çevrilir. Çünki əməliyyat arxa tərəfdən aparılır. Bu məsələ dəqiq şəkikdə araşdırılmalıdır”.
