Hazırda ölkənin milli valyutasının məzənnəsi ilə bağlı heç bir risk yoxdur
Mərkəzi Bank bundan sonra hərraclarda banklara nə qədər dollar satdığı barədə məlumat açıqlamayacaq. Mərkəzi Bankdan verilən açıqlamada deyilib ki, hərraclarda formalaşan məzənnənin sabit qalması və bankların valyuta tələbinin tam qarşılanması səbəbindən bu məlumatların ictimaiyyətə təqdim edilməsi artıq aktual hesab olunmur.
İqtisadçı-ekspert Xalid Kərimli isə “Sherg.az”a açıqlamasında deyib ki, hərracda satılan dollarla bağlı məlumatların gizlədilməsi o qədər də ciddi məsələ deyil:
“Ola bilsin ki, MB banklara satdığı dollarla bağlı məlumatları açıqlayanda bu xəbər adi vətəndaşların xarici valyutaya marağının artmasına səbəb olur deyə, qurum belə bir qərara gəlib. Yəni bir neçə həftə ard-arda dollar alışının çoxalması cəmiyyətdə psixoloji fikir formalaşdırır ki, manata təhlükə var, dollar alıb saxlamaq lazımdır. Halbuki, hazırda ölkənin milli valyutasının məzənnəsi ilə bağlı heç bir risk yoxdur. Neftin dünya bazarında qiyməti hələ də yüksək olaraq qalıb və yaxın 3 ay ərzində də belə bir risk gözlənilmir. Ola bilsin ki, gələcəkdə yaranacaq hər hansı bir riskin qarşısını almaq, psixoloji effekti idarə etmək məqsədilə məlumatların ictimaiyyətdən gizlədilməsinə qərar veriblər”.
