Bu ilin ilk iki ayında Türkiyənin ixrac həcmi 41,9 milyard dollara çatıb ki, bu da 2024-cü ilin yanvar-fevral göstəricisindən 2,1 faiz çoxdur.
AZƏRTAC xəbər verir ki, bu barədə Türkiyənin ticarət naziri Ömər Bolat fevralın 4-də Ankarada keçirilən mətbuat konfransında məlumat verib.
Onun sözlərinə görə, məhz fevral ayında Türkiyə 20,8 milyard dollarlıq məhsul ixrac edib ki, bu da “Ankaranın iqtisadi proqramının müsbət nəticəsidir”.
O, Türk Dövlətləri Təşkilatına (TDT) üzv ölkələrə Türkiyə məhsullarının tədarükünün artmasını xüsusilə qeyd edib. “Bu ilin yanvar-fevral aylarında TDT ölkələrinə tədarük edilən Türkiyə məhsullarının həcmi 9,2 faiz artıb ki, bu da çox sevindirici haldır”, - deyə türkiyəli nazir bildirib.
Ticarət naziri daha sonra azalan inflyasiya və işsizlik göstəricilərinə diqqət çəkib. “Bu ilin yanvar ayında Türkiyədə işsizlik 8,4 faizə düşüb ki, bu da 2013-cü ildən bəri ən yüksək məşğulluq səviyyəsidir. Bununla yanaşı, fevralda ölkədə inflyasiya son 20 ayın minimumu olan 39,05 faizə düşüb”, - deyə nazir qeyd edib.
Ö.Bolat dünya bazarlarındakı vəziyyəti də şərh edərək bildirib ki, ABŞ administrasiyasının Çin, Avropa İttifaqı ölkələri, Kanada və Meksika üçün əlavə rüsumlar tətbiq etmək qərarı “ticarət müharibələrini” gücləndirir və qlobal ticarətdə qeyri-müəyyənliyə gətirib çıxarır.
