“PKK terror təşkilatı yay qurtarmamış tərksilah ediləcək”.
Bunu Türkiyə parlamentinin sədri Numan Kurtulmuş deyib.
“Önəmli mərhələlərdən biri təşkilatın tərksilah edilməsidir. Silahların yerə qoyulduğu açıq şəkildə görünməlidir. Düşünürəm ki, silahlar yay bitməmiş yerə qoyulacaq”, - spiker bildirib.
Qeyd edək ki, mayın 12-si PKK özünü buraxdığını və silahlarını təslim edəcəyini açıqlayıb.
Siyasi şərhçi Kazım Kazımov Sherg.az-a bildirib ki, artıq 50 ilə yaxındır Türkiyədə fəaliyyət göstərən PKK terror təşkilatı demək olar ki, bitib:
"Ötən günlərdə bu qurum özünün ləğv edildiyini, silahı yerə qoyduğunu açıqladı. Həmçinin Türkiyə hökumətinin məsələ ilə bağlı bir çox addım atması gözlənilir. Texniki cəhətdən nəzər salsaq, PKK təşkilatının üzvləri jandarmalar və digər mərkəzlərə gələrək silahları təhvil etməli, o cümlədən özlərinin təslim olduğu barədə bəyanat verməlidirlər. Sonrakı mərhələdə hər hansı pozuntunun yaranmayacaq. Təşkilatın üzvləri çox güman ki, amnistiya hüququ istəyəcəklər. Ümumiyyətlə bu, qardaş Türkiyə üçün tarixi qələbədir. Çünki PKK terror təşkilatının fəaliyyəti dövründə ölkə mübarizə yolu keçərək minlərlə şəhid verdi. Lakin bu gün Türkiyənin artan regional gücü və güclü hərbi mövqeyi terror bəlasından qurtulmağa şərait yaratdı".
Şərhçinin fikrincə, yay aylarının sonuna qədər PKK silahı tamamilə təhvil verməlidir:
"Çünki prosesin uzanmağı məsələnin gələcək sağlamlığı üçün problem təşkil edə bilər".
