Sentyabrın 16-da Parisdə Ermənistan və Fransa Xarici İşlər nazirlikləri arasında siyasi məsləhətləşmələr keçirilib.
Xarici işlər nazirinin müavini Vaan Kostanyan və Fransanın Avropa və Xarici İşlər Nazirliyinin Kontinental Avropa Departamentinin rəhbəri Bris Rokfey siyasi məsləhətləşmələr zamanı iki ölkə arasında iqtisadiyyat, infrastruktur, müdafiə və mədəniyyət sahəsində əməkdaşlıq proqramlarını, onların gələcək inkişaf və genişlənmə perspektivlərini, habelə beynəlxalq təşkilatlarda və digər çoxtərəfli platformalarda mövcud əməkdaşlıq məsələlərini müzakirə ediblər.
Bu çərçivədə qarşılıqlı maraq doğuran məsələlər üzrə yanaşmaların yaxınlaşması üçün davamlı qarşılıqlı dəstəyin və əlavə səylərin lazım olduğu vurğulanıb.
Ermənistan-Avropa İttifaqı tərəfdaşlığının gündəliyi ilə bağlı məsələlərə toxunulub.
Ermənistan və Fransa arasında strateji tərəfdaşlıq haqqında sənəd və onun imzalanma müddəti barədə ətraflı müzakirələr aparılıb.
Ən aktual regional və beynəlxalq mövzular ətrafında da fikir mübadiləsi aparılıb. Vaşinqtonda Ermənistanla Azərbaycan arasında münasibətlərin nizamlanması çərçivəsində əldə edilmiş razılaşmalara, həmçinin Ermənistan və Türkiyə arasında münasibətlərin normallaşdırılması prosesinə toxunulub.
Beynəlxalq məsələlər üzrə ekspert Əziz Əlibəyli Sherg.az-a bildirib ki, Fransa ilə Ermənistan arasında siyasi məsləhətləşmələrə hər zaman ehtiyac duyulub:
"Çünki Fransa Qafqazdakı siyasətini Ermənistan üzərindən şəkilləndirir. Əvvəlcə, Gürcüstan Prezidenti Salome Zurabişvilinin dönəmində Fransanın bu ölkənin xarici siyasət xəttin də bir az müdaxiləsi var idi. Həmçinin Ermənistan ilə xüsusi yaxınlıq, strateji əməkdaşlıq və rəsmi Parisin bölgədə olmaq istəyi hər zaman açıq-aydın bəlli olub. Bu baxımdan rəsmi İrəvan bütün məsələləri Fransa ilə müzakirə edir. Hətta Makron bütün Cənubi Qafqaz regionunda baş verənləri bilməkdə xüsusi maraq göstərir. Məhz Fransanın təsirinin nəticəsidir ki, Azərbaycan və Ermənistan arasında sülh müqaviləsinin gecikməsinin şahidi olduq".
