“Bu il imtahan sualları keçənilkindən çətin idi, keçid balları qalxmaya bilər”
«Ötənilki keçid balı ilə müqayisədə bu il III qrupda bəzi ixtisaslarda keçid balları 3-5 bal arta bilər». Bunu Dövlət İmtahan Mərkəzinin İdarə Heyətinin sədri Məleykə Abbaszadə AzTV-nin "Hədəf" verilişində deyib. Onun sözlərinə görə, II ixtisas qrupunda bu vəziyyət görünmür:"I və IV ixtisas qrupunda da düşünürük ki, ballar ötənilki səviyyədə olsun. Ümumilikdə, ərizə verənlərin sayından yox, bütün imtahan nəticələrindən sonra müqayisə edilə bilər ki, müsabiqəyə kim buraxılsın. Müsabiqəyə buraxılanlar isə yalnız 200 baldan, ya da müəyyən istiqamətlər üzrə 150 baldan yuxarı nəticə göstərən şəxslərdir". M.Abbaszadə əlavə edib ki, bu il 1000-dən çox şəxs 600-dən yuxarı bal toplayıb.
DİM sədrinin fikirlərini şərh edən təhsil eksperti Ramin Nurəliyev Sherg.az-a açıqlamasında buraxılış və blok imtahanlarının birinci cəhdinin nəticəsinə əsaslanaraq keçid ballarının qalxacağını ehtimal etmədiyini deyib:
“Keçid balları adətən sualların asan olduğu hallarda yüksəlir. Bu il keçirilən buraxılış imtahanları isə keçən illə müqayisədə asan deyildi, əksinə, bir qədər çətin idi. Eyni fikri blok imtahanlarının birinci cəhdi barədə də demək olar. Xüsusilə II və III ixtisas qruplarında tarix fənnindən verilən sualların çətinliyi abituriyentlər tərəfindən də açıq şəkildə hiss olundu.
Ümumiyyətlə, imtahan sualları çətin olduqda, nəticələr aşağı düşür və bu, keçid ballarına da təsir edir. Əgər Məleykə xanımın dediyi kimi, III qrup üzrə bəzi ixtisaslarda keçid balları 3-5 bal artacaqsa, bu, yalnız o halda mümkündür ki, ikinci cəhd imtahanlarında suallar birincidən asan olsun. Deməli, DİM sədrinin bu açıqlaması dolayı şəkildə ikinci cəhd imtahanının daha asan olacağına işarədir. Əks halda, suallar çətin olarsa, keçid ballarının yüksəlməsi məntiqə uyğun deyil. I ixtisas qrupuna gəlincə, DİM sədri riyaziyyat fənninin ötən illərlə müqayisədə daha çətin olduğunu bildirib. Əgər ikinci cəhd imtahanında da riyaziyyat sualları bu səviyyədə çətin olarsa, bu halda I qrup üzrə keçid ballarının aşağı düşməsi gözləniləndir. Bütün bu fikirlər mənim şəxsi təhlilimə əsaslanır. Lakin bir məsələni unutmaq olmaz ki, imtahan prosesi və keçid balları nəticədə dövlətin təsdiq etdiyi plan yerlərinə uyğun formalaşacaq. Keçən il 58 min plan yeri ayrılmışdısa, bu il bu rəqəm 60 500-ə çatdırılıb. Bu isə o deməkdir ki, plan yerlərinin dolması üçün minimum 65-70 min abituriyentin müsabiqə şərtlərinə cavab verib müsabiqəyə buraxılması vacibdir. Əgər ikinci cəhd imtahan sualları da çətin olarsa və nəticələr zəif çıxarsa, bu qədər plan yerinin dolması real görünmür. Bu isə ikinci cəhdin daha yüngül tərtib olunacağı ehtimalını bir qədər də gücləndirir”.
