“Ötən illər ərzində danışıqların heç bir nəticə vermədiyini gördük”
“Deməli, yeganə variant hərbi əməliyyatlar keçirməkdir”
“O zaman yanğınlara da, işğala da son qoyulacaq. Əks halda isə təxribatlar davam edəcək”
Ermənilər işğal altında olan Azərbaycan torpaqlarında yenidən yanğınlar törədib. Ermənistan silahlı bölmələri Ağdamın işğal altında olan Qızılı Kəngərli kəndinin ərazisinə od vurub. Yanğının miqyası getdikcə genişlənir.
Dağ massivində baş verən yanğın cəbhəyanı bütün yaşayış məntəqələrindən müşahidə olunur. Qeyd edək ki, işğalçı Ermənistan ordusu nəzarəti altında olan Azərbaycan ərazilərində mütəmadi yanğınlar törədir.
Düşmən işğalla kifayətlənmir, vandallıqlar, vəhşiliklər törətməkdə davam edir. Bəs nə vaxtadək? 30 il çox deyilmi? Cənnət torpağı cəhənnəmə çevirməkdə məqsəd nədir?
Bu barədə “Sherg.az”a münasibət bildirən millət vəkili Elman Məmmədov düşmənin məkrli siyasətindən danışıb:
“Ağdamın işğalında 27 il ötür. 1993-cü ildən üzü bəri ermənilər Dağlıq Qarabağı talayır, dağıdırlar. Onlar saxta tarix yazmaq istəyirlər. Tarixi torpaqlarımızda Azərbayacana aid olan nişanələri erməni işarələri ilə əvəz edirlər. Beləliklə, “Dağlıq Qarabağ bizimdir, biz torpaqları işğal yox, azad etmişik” demək istəyirlər. Ona görə də Şuşamızı, Ağdamımızı, Laçınımızı...azad etmək vaxtı çatıb, məqam yetişib. Ötən illər ərzində danışıqların heç bir nəticə vermədiyini gördük. Deməli, yeganə variant Azərbaycan ordusunun gücünə əsaslanaraq hərbi əməliyyatlar keçirməkdir. O zaman yanğınlara da, səfeh bəyənatlara da, işğala da son qoyulacaq. Əks halda isə təxribatlar davam edəcək”.
E.Məmmədovun fikrincə, dünya dövlətləri də artıq Ermənistana inanmırlar:
“Tovuz təxribatının məqsədlərindən biri də KTMT ölkələrini münaqişəyə cəlb etmək idi. Amma heç bir dövlət Azərbaycan-Ermənistan sərhəddində baş verən təxribata müdaxilə etmədi. Bu, bizim üçün siqnaldır. Başa düşməliyik, həmin iyirmi faiz ərazi bizimdir və biz öz torpaqlarımızda hərbi əməliyyatlar keçirəcəyik. Dövlətlər, bəlkə də, dolayısı yolla, hansısa bir formada Ermənistana yarım edərlər. Amma kömək birbaşa, yəni münaqişəyə açıq-aşkar müdaxilə şəklində ola bilməz. Çünki bu, olmayan beynəlxalq hüquqa ziddir.
Odur ki, biz hərbi əməliyyatlara başlamalıyıq. Onda Ermənistan və havadarları anlayacaq ki, indiki Azərbaycan 90-cı illərdəki Azərbaycan deyil”.
