2023-cü ildə 531 uşaq ölü doğulub.
Bu barədə Dövlət Statistika Komitəsindən Bizim.media-nın sorğusuna cavab olaraq bildirilib.
Qeyd edək ki, 2022-ci ildə 597, 2021-ci ildə 556, 2020-ci ildə isə 519 uşaq ölü doğulub.
Maraqlıdır, körpələr hansı səbəblərə görə ölü doğulurlar? Hamiləlikdə qadınlar nəyə diqqət etməlidirlər?
Məsələ ilə bağlı mama-ginekoloq Rəşad Sultan “Sherg.az”a bildirib ki, uşaq ana bətnində 22 həftədən əvvəl ölürsə, buna düşük deyilir:
''Ancaq bətindaxili ölümün səbəbləri müxtəlifdir. Özəlliklə hamiləliyin sonuna yaxın uşaq ölümünün səbəbi döldəki qan dövranının pozulmasıdır. Döl qanı, qanın içərisindəki əsas qida maddələrini və oksigeni anadan cift vasitəsi ilə alır. Cift qan dövranı hamiləliyin birinci üç aylığında formalaşır. Bilmədiyimiz səbəblərdən bəzən bu formalaşma qan dövranında tam getmir. Ona görə də bu problem hamiləliyin sonlarına doğru, dölün tələbatı artanda özünü göstərməyə başlayır. Belə ki, uşaq yavaş-yavaş inkişafdan qalır, oksigen, qida azlığının əlamətləri özünü göstərir. Nəticədə uşaq ana bətnində ölür. Ciftin qan dövranının pozulmasının səbəbi bəlli olmur deyə, bunun müalicəsi yoxdur. Bəzən hamilə qadında öncədən risk olduqda profilaktik müalicə edirik. Bununla bir qədər problemi qismən həll etmək olur. Ancaq bu da çox vaxt effekt vermir''.
Ginekoloq vurğulayıb ki, ana bətnində uşaq ölümlərinin digər səbəb isə bətndaxili infeksiyalar və genetik xromosom qüsurları ola bilər :
''Bunlar daha çox mamalıq elminə aid mövzulardır. Uşaq ölümünün aktual səbəbi kimi genetikanı da göstərmək olar. Bununda altında indiki dövrdə qohum evlilikləri durur. Əlavə olaraq, gec yaşda ana olmaq yeni səbəblərdən sayıla bilər. Bu, bir faktdır. Həmçinin, bu amil bətndaxili inkişafın gerilik riskini artırır".
