Ermənistan regionda kommunikasiyaların açılması üçün heç bir real addım atmayıb
Qonşu dövlətlərlə normal münasibətlərə böyük əhəmiyyət verir və regionda açıq sərhədli və tərəfdaşlığa əsaslanan münasibətlər qurmağa çalışırıq. Bunu Ermənistan parlamentinin spikeri Alen Simonyan İrəvanda keçirilən Ermənistan-Avropa Birliyi Parlament Tərəfdaşlığı Komitəsinin dördüncü iclasının açılışındakı çıxışında deyib. Simonyan qeyd edib ki, Ermənistan hökuməti regionumuzun nəqliyyat və kommunikasiya marşrutlarını ölkələrin suverenliyi, bərabərliyi, ərazi bütövlüyü və qarşılıqlı münasibətlər prinsipləri əsasında daha səmərəli etmək üçün “Sülh qovşağı” layihəsini irəli sürüb: “Regiondakı ölkələr və güc mərkəzləri ilə təhlükəsizlik, iqtisadiyyat, enerji və digər sektorlar arasındakı fərqə əsaslanaraq balanslaşdırılmış siyasət aparmağa çalışırıq”.
Politoloqlar isə hesab edir ki, Ermənistanın “sülh qovşağı” ideyasının reallaşması Azərbaycanla sülh sazişinin imzalanmasından və Zəngəzur dəhlizinin işə düşməsindən asılıdır. Bu iki məsələnin həllində isə irəliləyiş yoxdur.
Simonyanın gündəmə gətirdiyi "sülh qovşağı" layihəsini Azərbaycanın məqbul hesab etmədiyini xatırladan politoloq İlyas Hüseynov “Sherg.az”a açıqlamasında qeyd edib ki, bu layihəni ilk dəfə Ermənistanın baş naziri Nikol Paşinyan tezislər şəklində bəyan etmişdi. İndi isə Ermənistan parlamentinin spikerinin nəsə maraqlı bir təkliflə çıxış edirmiş kimi bu mövzuya toxunması, regionda açıq sərhədli və tərəfdaşlığa əsaslanan münasibətlər qurmağa çalışdıqlarını bəyan etməsi Ermənistanın sülh danışıqlarının mahiyyətindən uzaqlaşdıqlarını göstərir:
“Ermənistan rəhbərliyinə elə gəlir ki, Türkiyə ilə sərhədin açılmasını və diplomatik münasibətlərin qurulmasını Azərbaycanla sülh sazişi imzalamadan da təmin etmək olar. Halbuki Türkiyə Prezidenti Rəcəb Tayyib Ərdoğan və digər dövlət rəsmiləri də dəfələrlə qeyd ediblər ki, Ankara Ermənistanla məsələlərin həll yolunda Bakı ilə koordinasiyalı fəaliyyət göstərir”.
Politoloq həmçinin bildirib ki, dənizə çıxışı olmayan və məhdud nəqliyyat infrastrukturunu nəzərə alaraq, Ermənistanın bu qədər yüksək tranzit həcmlərinə nail olması ehtimalı azdır:
“Ermənistan dənizə çıxışın olmaması və infrastrukturun kifayət qədər inkişaf etməməsi kimi ciddi məhdudiyyətlərlə mübarizə aparmağa məcburdur. Qlobal marşrutlar və nəqliyyat dəhlizləri transformasiya olunmağa davam etdikcə, region ölkələri üçün uğurun əsas amili artıq mövcud olan və inkişaf edən logistika sistemlərinə inteqrasiya olunmaq qabiliyyəti olacaq. Qeyd edim ki, Ermənistan regionda kommunikasiyaların açılması üçün heç bir real addım atmayıb, uzağa getmək lazım deyil, Zəngəzur dəhlizi layihəsinin kontekstində bunun aydın nişanələrini görmək mümkündür. Paşinyanın öhdəliklərdən boyun qaçırması yeni fakt deyil, Zəngəzur dəhlizi ilə bağlı isə manipulyasiya edir. Fikir versək, görərik ki, Paşinyan Zəngəzur dəhlizi layihəsinin adını çəkmir, ümumi fonda regional kommunikasiyaların açıq olmasının vacibliyindən bəhs edir. Bunun özü qeyri-müəyyən mövqedir. Ermənistan bu zamana qədər ən qısa yolun çəkilişini də həll edə bilməyib - uzun illərdir İrandan magistral yol, dəmiryol xətti çəkmək istəyən Ermənistan buna vəsait tapmadı. Bu mənada Simonyanın açıqladığı bu ideyaların reallaşacağı inandırıcı deyil”.
