Belçikanın paytaxtı Brüsseldə NATO Müdafiə Nazirlərinin toplantısı keçirilib.
Teleqraf xəbər verir ki, NATO-nun baş katibi Mark Rutte açılış nitqində çıxış edərək əsas hədəfləri açıqlayıb.
"İlk hədəfimiz müdafiə xərclərini artırmaqdır. Təhlükəsizlik və müharibənin qarşısını almaq üçün, xüsusilə Avropa və Kanadada daha çox vəsait xərcləməmiz lazımdır Son 10 ildə avropalı müttəfiqlər və Kanada müdafiə üçün 700 milyard ABŞ dollarından çox vəsait ayırıblar. Biz daha çox iş görməliyik. Müdafiə sənayesinin gücləndirilməsi NATO-nun ikinci prioritetidir. Müdafiə sənayesi qürur mənbəyimiz olan ABŞ, Avropa və Türkiyənin timsalında dünyanın ən yaxşı sənayelərinə sahibik. Amma rəqiblərimiz Rusiya, Çini və digərlərini geridə qoymalıyıq", deyə baş katib bildirib.
M.Rutte əlavə edib ki, üçüncü prioritet Rusiyanın sabitliyi pozan fəaliyyətinin qarşısını almaqdır: "Rusiya donanması Moskva üçün mühüm gəlir mənbəyidir. "Baltic Watch" əməliyyatı gücümüzü necə artıra biləcəyimizə yaxşı bir nümunədir. Biz Ukraynaya dəstək məsələsini müzakirə etməliyik və çıxış yolu tapmalıyıq".
