Türkiyəli həkim və qidalanma üzrə mütəxəssis Canan Karatay qidalanma ilə bağlı növbəti açıqlamasında aclıq, su qəbulu və duz balansının əhəmiyyətindən danışıb.
Sherg.az-ın məlumatına görə, Karatay bildirib ki, gün ərzində davamlı şəkildə qidalanmaq həzm sisteminin fasiləsiz işləməsinə səbəb olur. Onun sözlərinə görə, insan orqanizminin müəyyən vaxtlarda həzm prosesinə ara verməyə ehtiyacı var.
Professor uzun illər tövsiyə olunan üç əsas və ara qidalanma sistemini tənqid edərək qeyd edib ki, insan metabolizmi fasiləsiz qida qəbuluna uyğun fəaliyyət göstərmir. O hesab edir ki, sağlam insanlarda qısamüddətli aclıq düşündüyü qədər zərərli deyil.
Karatayın fikrincə, əsas təhlükə susuzluq və mineral balansının pozulmasıdır:
“Aclıq faydalıdır. Ən təhlükəli olan isə susuzluq və duzsuzluqdur”.
O, həmçinin orqanizmdə təbii mineral balansının qorunmasının vacibliyini vurğulayaraq, həddindən artıq emal olunmuş qidaların bu tarazlığı poza biləcəyini bildirib.
Canan Karatay uşaqların qidalanmasına da toxunaraq, şəkərli və qazlı içkilərin gündəlik həyatın ayrılmaz hissəsinə çevrilməməsinin vacibliyini qeyd edib. O, valideynlərə bu məhsulları evə almamağı tövsiyə edib.
Mütəxəssislər isə xatırladırlar ki, qidalanma ilə bağlı tövsiyələr hər kəs üçün eyni olmur və yaş, sağlamlıq vəziyyəti, fiziki aktivlik səviyyəsi kimi amillər nəzərə alınmalıdır.
