Son günlər sosial şəbəkələrdə qulaq seyvanında görünən çarpaz xəttin ürək-damar xəstəliklərinin xəbərçisi olması ilə bağlı müzakirələr geniş yayılıb.
Sherg.az-ın məlumatına görə, tibbdə “Frank əlaməti” kimi tanınan bu xəttin ürək sağlamlığı ilə əlaqəsi barədə mütəxəssislər açıqlama veriblər.
Kardioloq Özge Özden Kayhan bildirib ki, bəzi elmi araşdırmalar Frank əlaməti olan şəxslərdə koronar arteriya xəstəliyinə daha çox rast gəlindiyini göstərsə də, bu əlamət təkbaşına ürək xəstəliyinin diaqnozu hesab edilə bilməz.
Mütəxəssisin sözlərinə görə, Frank əlaməti qulaq seyvanını çarpaz şəkildə kəsən aydın və dərin xəttdir. Alimlər hesab edirlər ki, bu xətt damarların yaşlanması və damar sərtliyi ilə əlaqəli dəyişikliklərin xarici əlaməti ola bilər. Lakin onun yaranma səbəbi hələ tam müəyyən edilməyib.
Özge Özden Kayhan vurğulayıb ki, yaş, siqaret istifadəsi, yüksək qan təzyiqi, şəkərli diabet, yüksək xolesterin və ailə anamnezi kimi risk faktorları ürək xəstəliklərinin qiymətləndirilməsində daha böyük əhəmiyyət daşıyır.
Həkim qeyd edib ki, qulağında bu xətti görən şəxslər təşvişə düşməməlidirlər. Xüsusilə gənc yaşda və heç bir şikayəti olmayan insanlarda Frank əlaməti təkbaşına ciddi xəstəlik demək deyil. Bununla belə, əlavə risk faktorları olan şəxslərin kardioloji müayinədən keçməsi faydalı ola bilər.
Mütəxəssislər xatırladırlar ki, qulaq seyvanındakı xəttə əsasən ürək xəstəliyi diaqnozu qoymaq mümkün deyil. Bu əlamət yalnız digər tibbi göstəricilər və müayinələrin nəticələri ilə birlikdə qiymətləndirildikdə əhəmiyyət kəsb edir.
